ལྟ་བ་དང་། སྐྱབས་གནས་ལྷ་དང་། སྟོན་པ་དང་། སྤྱོད་པ་དང་། འབྲས་བུ་དང་ལྔའི་ཁྱད་པར་ཡོད་པའི་ཕྱིར།
དང་བོ་ཡོད་དེ། ཕྱི་བས་ནི། ལྟ་བ་རྟག་ཆད་གང་རུང་དུ་ལྟ་ཞིང་བཀའ་རྟགས་ཕྱག་རྒྱའི་མདོར་བཞི་ཁས་མི་ལེན་ཞིང་། ནང་བས་ནི། དེ་ལས་ལྡོག་པས་ཁྱད་པར་དུ་འཕགས་པའི་ཕྱིར་ཏེ། མདོ་ཕྲན་ལས། མུ་སྟེགས་ལྟ་བ་ཤིན་ཏུ་མི་བདེན་ཏེ། །ང་དང་བདག་ནི་ཡོད་པ་མ་ཡིན་ནོ། །ཞེས་དང་། དབུས་གཏེར་ཚད་མ་སྨྲ་བའི་སེང་གེ་ལས། བོན་གྱི་མདོ་བཞི་ཁས་ལེན་པ་ནི་གཤེན་རབ་ལ། དེ་མི་ལེན་པ་ནི་མུ་སྟེགས་པའོ། །དེ་ལ་མདོ་བཞི་ནི། འདུས་བྱས་ཐམས་ཅད་ཀྱི་མདོ་མི་རྟག་པ། ཟག་པ་དང་བཅས་པ་ཐམས་ཅད་ཀྱི་མདོ་སྡུག་བསྔལ་བ། བོན་ཐམས་ཅད་ཀྱི་མདོ་བདག་མེད་པ། མྱ་ངན་ལས་འདས་པ་ཐམས་ཅད་ཀྱི་མདོ་ཞི་བའོ། ། ལྟ་བ་ནི་བདག་དང་བཅས་པ་དང་། བདག་མེད་པའོ། །ཞེས་གསུངས་པའི་ཕྱིར།
གཉིས་པ་ཡོད་དེ། ཕྱི་བས་ནི། ཚངས་པ་དང་། དབང་ཕྱུག་དང་། ཁྱབ་འཇུག་གསུམ་སོགས་འཇིག་རྟེན་གྱི་ལྷ་ལ་སྐྱབས་གནས་སུ་འཛིན་ལ། ནང་བས་ནི། དཀོན་མཆོག་གསུམ་ལ་སྐྱབས་གནས་འཛིན་པས་ཁྱད་པར་དུ་འཕགས་པའི་ཕྱིར། །
གསུམ་པ་ཡོད་དེ། ཕྱི་བས་ནི། དབང་ཕྱུག་སོགས་ཐུན་མོང་གི་གྲུབ་རྟགས་དང་ལྡན་པའི་ལོག་ལྟའི་རྟུལ་ཤུགས་ཅན་ལ་སྟོན་པར་འཛིན་ཞིང་། ནང་བས་ནི། རྣམ་པ་ཐམས་ཅད་མཁྱེན་པའི་རྫོགས་པའི་སངས་རྒྱས་ལ་སྟོན་པར་འཛིན་པས་ཁྱད་པར་དུ་འཕགས་པའི་ཕྱིར་ཏེ། སྨྲ་བའི་སེང་གེ་ལས། ལྷ་ནི་གཤེན་རབ་ཐུགས་རྗེ་ཅན་དང་། དབང་ཕྱུག་ཐེར་ཟུག་པའོ། །ཞེས་གསུངས་པའི་ཕྱིར། །
བཞི་བ་ཡོད་དེ། ཕྱི་བས་ནི། ཕལ་ཆེར་སྡིག་པའི་སྤྱོད་པའམ། རང་སྣང་གང་དགའི་བྱ་བ་དང་། འགའ་ཞིག་གིས། མེ་ལྔ་བརྟེན་པ་དང་། དབྱུ་གུ་གསུམ་པ་སོགས། ངལ་བ་དོན་མེད་ཁོ་ནར་སྤྱོད་པ་ལ། ནང་བས་ནི། སྒྲིབ་སྦྱོང་ཚོགས་གཉིས་བསགས་པའི་ཐབས་ཕྱིན་ཅི་མ་ལོག་པ་ཅི་རིགས་ལ་འབད་པས་ཁྱད་པར་དུ་འཕགས་པའི་ཕྱིར། །
ལྔ་བ་ཡོད་དེ། ཕྱི་བས་ནི། རང་སྣང་གི་ལྷ་མངོན་ཞེན་དུ་བསྒོམ་པས་དབང་ཕྱུག་སོགས་དྲེགས་པ་ཅན་ཐོབ་པ་དང་། རང་རྒྱུད་རྩུབ་པ་དང་། འཇིག་རྟེན་ལ་ཞེན་ཆགས་ཆེ་བར་འགྱུར་བ་དང་། འཕྱལ་བར་སྒོམ་པས། གཟུགས་མེད་དམ། འབྱུང་བའི་བག་ལ་ཞ་བའི་ཉེ་འཁོར་ཐོབ་པར་འགྱུར་ལ། ནང་བས་ནི། མཐར་ཐུག་མཁྱེན་བརྩེ་ནུས་གསུམ་དང་སྐུ་དང་ཡེ་ཤེས་དཔག་ཏུ་མེད་པའི་བདག་ཉིད་རྫོགས་པའི་སངས་རྒྱས་ཐོབ་པར་འགྱུར་བས་ཁྱད་པར་དུ་འཕགས་པའི་ཕྱིར་ཏེ། སྨྲ་བའི་སེང་གེ་ལས། ལྟ་བ་ངན་པའི་མུའི་འཁོར་བའི་རྒྱ་མཚོར་སྟེགས་འཆའ་བའི་ཕྱིར་རོ། །ཞེས་དང་སུམ་བརྒྱ་བ་ལས། སྐྱབས་གནས་སྟོན་པ་ལྟ་སྤྱོད་འབྲས་བུ་ཡིས། །ཕྱི་རོལ་ནང་བའི་ཁྱད་པར་འབྱེད་པར་བྱེད། །ཅེས་གསུངས་པའི་ཕྱིར། །
ཞེས་འདི་ཀ་དྲ་བའི་དོ་དམ་པས་མཁན་ཆེན་ཉི་མ་བསྟན་འཛིན་མཆོག་གིས་མཛད་པའི་༼ཤེས་རབ་ཀྱི་བླ་ན་མེད་པར་ཕྱིན་པ་མངོན་པར་རྟོགས་པའི་རྒྱན་ལས་སྐབས་དང་བོའི་རྣམ་བཤད་ཚིག་དོན་དཀའ་གནད་རབ་གསལ༽ལས་བཤུས་པའོ། །