ད་ལྟ་ཁྱེད་ཀྱི་གནས་ཡུལ་ནི། - ཧི་མ་ལ་ཡའི་བོན། >> གསུང་རབ། >> དཔེ་ཚོགས། >> ཡོངས་འཛིན་བསྟན་འཛིན་རྣམ་དག་གི་གསུང་འབུམ།
ཡོངས་འཛིན་བསྟན་འཛིན་རྣམ་དག་གི་གསུང་འབུམ།
[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། tibetmonk] [ཟླ་ཚེས། 10-07-05] [ཀློག་གྲངས། ]

       ༧སྐྱབས་རྗེ་ཡོངས་འཛིན་རིན་པོ་ཆེ་མཆོག་གི་གསང་གསུམ་གྱི་འཕྲིན་ལས་བསམ་གྱིས་མི་ཁྱབ་པའི་ཁོངས་ནས་རྩོམ་པ་བོན་གྱི་འཁོར་ལོ་སྟེ། སངས་རྒྱས་བསྟན་པའི་གསལ་བྱེད་དང་ཕྱི་རབས་པ་རྣམས་ཀྱི་དོན་དུ། གཙོ་བོར་སྟོན་པ་རྫོགས་པའི་སངས་རྒྱས་ཀྱིས་བསྟན་པའི་བཀའ་ཚད་མ་དང་། སྔོན་བྱོན་མཁས་གྲུབ་གོང་མ་རྣམས་ཀྱིས་གསུངས་བའི་ལུང་ཚད་མ། དེ་དག་གི་ཚིག་དོན་གང་ཐད་ཐོག་དཔྱད་པ་གསུམ་གྱིས་དག་ཐེར་ཡང་ཡང་མཛད་པ་དང་། དཔྱད་དོན་གྱི་རྒྱུད་ཐོག་ལ་བཀལ་བའི་དགོངས་རྟོགས་རྣམས་པར་དག་པ་ལས་འཁྲུངས་པའི་རིག་པ་ཚད་མ་གསུམ་གྱི་བྲེ་སྲང་ལས་བཤར་བའི་ལེགས་བཤད་བདུད་རྩི་དང་འདྲ་བ་དུ་མ་རྗེས་བཞག་མཛད་པ་རྣམས་ཕྱོགས་བསྒྲིགས་བྱས་པའི་པོ་ཏི་སྟོབས་འཁོར་བཅུ་གསུམ་གྱི་གྲངས་དང་མཉམ་པ་ལོངས་འདུག་པ་རྟེན་འབྲེལ་གྱི་གནད་དུ་ལེགས། འདི་ག་༧དཔལ་ལྡན་ཁྲི་བརྟན་ནོར་བུ་རྩེའི་དཔེ་མཛོད་ཁང་ནས་བོད་ཀྱི་གནའ་བོའི་ཆོས་དང་རིག་གཞུང་མི་ཉམས་གཅེས་སྲུང་བྱ་རྒྱུའི་ལས་འཆར་དུ་མ་ཡོད་པའི་ནང་ནས་བོན་གྱི་གསུང་རབ་གལ་ཆེན་ཁག་དཔེ་གཟུགས་སམ་དེབ་གཟུགས་སུ་དཔར་འགྲེམས་བྱ་རྒྱུའི་ལས་འཆར་ཁོངས་སུ་ད་ཕན་གལ་ཆེའི་དཔེ་ཆ་དེབ་ཕྲེང་བཞི་བཏོན་ཟིན་པ་དང་། ད་ལམ་༧སྐྱབས་རྗེ་ཡོངས་འཛིན་རིན་པོ་ཆེ་མཆོག་དགུང་གྲངས་བརྒྱད་ཅུར་ཕེབས་པའི་རྟེན་འབྲེལ་མཛད་སྒོ་དང་བསྟུན་ཏེ་༧སྐྱབས་རྗེ་མཆོག་གིས་སྤྱི་ལོ་༢༠༠༢བར་མཛད་པའི་གསུང་འབུམ་པོད་བཅུ་གསུམ་ཐམ་པ་ཕྱོགས་སྒྲིག་དང་། དཔར་འགྲེམས་ཞུ་རྒྱུའི་གོ་སྐབས་བྱུང་བར་ངེད་ཚོ་གྲྭ་ཚང་བླ་སློབ་ཐམས་ཅད་དགའ་སྤྲོ་ཚད་ལས་འདས། དེ་ཡང་གསུང་འབུམ་པོད་བཅུ་གསུམ་གྱི་ནང་འཁོད་དཔེ་ཐོ་རགས་བསྡུས་ཤིག་བཀོད་ན། 
      པོད་དང་པོ་དང་གཉིས་པ་གཉིས་ཀྱི་ནང་དུ། མཛད་མདོ་རྒྱས་པ་དྲི་མེད་གཟི་བརྗིད་དང་། འབྲིང་པོ་གཟེར་མིག་གཉིས་ནས་སྟོན་པའི་སྐྱེས་རབས་ལོ་རྒྱུས་རྣམས་ཟུར་དུ་ཕྱུངས་ཏེ་དོན་གཉེར་ཅན་རྣམས་ཀྱིས་གཟིགས་བདེར་བཀོད་སྒྲིག་མཛད་ཡོད་པ་དང་། དོན་གནད་གལ་ཆེན་ཁག་འགར་དྭོགས་དཔྱོད་དང་གསལ་བཤད་གནང་ཡོད་ཅིང་གལ་ཆེའི་མིང་ཚིག་ཁག་འགར་ཟུར་བཀོད་ཀྱིས་མཆན་འགྲེལ་མཛད་ཡོད་པའི་གསུང་། ༼སྟོན་པ་སངས་རྒྱས་ཀྱི་སྐྱེས་རབས་པད་མ་དཀར་པོའི་ཕྲེང་བ༽ཞེས་པའི་པོད་སྟོད་སྨད་གཉིས་འཁོད་ཡོད། 
      པོད་གསུམ་པའི་ནང་དུ། རང་རིགས་གཞོན་སྐྱེས་རྣམས་ལ་བོད་རང་གི་གནའ་བོའི་ཆོས་དང་རིག་གཞུང་ཡུལ་སྲོལ་གོམ་གཤིས་བཅས་ངོ་སྤྲོད་ཆེད། བོན་ཆོས་གཉིས་ཀྱི་ཡིག་རྙིང་ཁུངས་མ་དག་ལ་གཞི་བཅོལ་ཏེ་རྒན་གཞོན་ཀུན་གྱིས་གོ་བདེ་གཙོར་འདོན་ཐོག་ལྷུག་པར་བྲིས་པའི་བོད་ཀྱི་རྒྱལ་རབས་༼སྔ་རབས་བོད་ཀྱི་བྱུང་བ་བརྗོད་པའི་འབེལ་གཏམ་ལུང་གི་སྙིང་བོ༽ཞེས་པ་དང་། གཡུང་དྲུང་བོན་གྱི་བྱུང་ཁུངས་ལོ་རྒྱུས་དང་གཞི་ལམ་འབྲས་གསུམ་གྱི་ཉམས་ལེན་གོ་བདེ་དོན་བསྡུས་སུ་བཀོད་པ་༼གཡུང་དྲུང་བོན་གྱི་བསྟན་པའི་འབྱུང་ཁུངས་ཉུང་བསྡུས་༽ཞེས་པ་དང་། ཞང་བོད་ཀྱི་ཡུལ་དུ་གཡུང་དྲུང་བོན་གྱི་སྒྲུབ་སྡེ་གནས་དགོན་གལ་ཆེ་བ་རྣམས་ཀྱི་དཀར་ཆག་དང་ལམ་ཡིག་སྟེ་གནས་སྡེ་མང་པོ་ཞིག་ཏུ་༧སྐྱབས་རྗེ་མཆོག་དངོས་སུ་ཕྱག་ཕེབས་མྱངས་བའི་ཉམས་མྱོང་དང་ལོ་རྒྱུས་ཡིག་ཆ་ཁག་གོ་བཏུག་གནང་སྟེ་མཛད་པ་༼བོད་ཡུལ་གནས་ཀྱི་ལམ་ཡིག་གསལ་བའི་དམིག་བུ༽བཅས་གསུང་ཁག་གསུམ་འཁོད་པའི་པོ་ཏིའི་མཚན་བྱང་དུ་༼བསྟན་འབྱུང་དང་ལོ་རྒྱུས་ཀྱི་སྐོར༽ཞེས་པ་དང་། 
     པོད་བཞི་བ། ༼རྣམ་ཐར་དང་དཀར་ཆག་གི་སྐོར། ༽ཞེས་པའི་ནང་དུ་ལྷ་ཁང་དང་མཆོད་རྟེན་སོགས་ཀྱི་དཀར་ཆག་འགའ་དང་སྟོན་པའི་སྐུ་ཡི་ཆ་ལུགས་ཀྱི་རྣམ་བཤད། སྟོན་པའི་འཁྲུངས་དུས་ལ་དཔྱད་པ། བོན་ཕྱི་ནང་གསང་གསུམ་གྱི་དབང་གི་བརྒྱུད་རིམ་བཅས། དཀར་ཆག་དང་། དཔྱད་རྩོམ། བསྟན་འབྱུང་། རྣམ་ཐར་སོགས་གསུང་རྩོམ་ཐུང་ངུགྲངས་སུམ་བཅུ་སོ་ལྔ་ཁོད་ཡོད། 
     པོད་ལྔ་པ། ༼བཟོ་རིག་པའི་སྐོར༽ཞེས་པའི་ནང་དུ་མཛད་མདོ་རྒྱས་པ་དྲི་མེད་གཟི་བརྗིད་ཀྱི་དགོངས་པ་ལྟར་སྐུ་གདུང་སྐུ་གཟུགས་ལྷ་ཁང་འབྲི་བཞེངས་སོགས་དང་འབྲེལ་བའི་བཟོ་རིག་གསལ་བའི་རྒྱན་ཞེས་པ་དང་། གསང་སྔགས་རྒྱུད་སྡེ་བཞིའི་ཡི་དམ་ཕལ་ཆེར་གྱི་དཀྱིལ་འཁོར་འབྲི་བཞེངས་བྱེད་ཚུལ་གྱི་བཤད་པ་གསལ་རྒྱས་སུ་བཀོད་པ་རབ་འབྱམས་དཀྱིལ་འཁོར་རྒྱ་མཚོའི་མཚན་གྱི་བཀོད་པ་གསལ་བྱེད། ཕྱྭ་གཤེན་ཐེག་པའི་བོན་སྒོ་ལས་བསྟན་པའི་སོག་མོའི་སྐོར། ཕྱྭ་གཤེན་ཐེག་པའི་རྣམ་བཤད། སྣང་གཤེན་ཐེག་པའི་རྣམ་བཤད་བཅས་གསུང་ཁག་ལྔ་འཁོད་ཡོད། 
      པོད་དྲུག་པ་དང་བདུན་པའི་ནང་དུ། གཡུང་དྲུང་བོན་གྱི་གསང་སྔགས་ཡི་དམ་གཙོ་འཁོར་གྱི་ཞལ་ཐང་གི་བཀོད་པ་རྣམས་རྒྱུད་སྡེ་སོ་སོར་ཁུངས་བཏུག་སྟེ། འགྲེལ་བཤད་དང་དཔེ་རིས་སྦྲག་སྟེ་གང་གསལ་བཀོད་པ། ༼རབ་འབྱམས་དཀྱིལ་འཁོར་རྒྱ་མཚོའི་ཞལ་ཐང་གི་བཀོད་པ་དྭངས་ཤེལ་མེ་ལོང་ཞེས་བྱ་བ༽པོད་སྟོད་སྨད་གཉིས་འཁོད་ཡོད། 
     པོད་བརྒྱད་པ། ༼བསྡུས་རྟགས་དང་ཕར་ཕྱིན་གྱི་སྐོར༽ཞེས་པའི་ནང་དུ། རིགས་ལམ་བསྡུས་གྲྭའི་རྣམ་བཤད་ངོས་འཛིན་བློ་གསར་འཇུག་སྒོ། རྟགས་ཀྱི་རིགས་པའི་རྣམ་བཤད་ཚད་མའི་གཞུང་ལ་འཇུག་པ། སྨོན་ལམ་ཡན་ལག་བརྒྱད་པ་ཐར་པའི་ཐེམ་སྐྲས་ཀྱི་རྣམ་བཤད་སྙིང་པོ་མངོན་པར་གསལ་བ། ཞི་གནས་ལག་ཏུ་ལེན་པའི་ཐབས་མདོ་རྒྱུད་རྒྱ་མཚོའི་དགོངས་བཅུད། འཇུག་སྒྲུབ་ལས་འཕྲོས་པའི་བསམ་གཟུགས་ཀྱི་སྐོར་བཅས་གསུང་ཁག་ལྔ་ཡོད། 
      པོད་དགུ་པ། ༼དབུ་མའི་རྣམ་བཤད་ཀྱི་སྐོར༽ཞེས་པའི་ནང་དུ། ཐེག་པ་ཆེན་པོ་ཡུམ་གྱི་མདོ་དོན་གསལ་བྱེད་སྣང་བ་གསར་པ། དཀའ་ཐུབ་ཀྱི་རྣམ་བཤད་རྒྱལ་བསྟན་གསལ་བྱེད། ཐེག་རིམ་གྱི་རྗེས་སུ་འབྲངས་ནས་ཡང་དག་ལྟ་བའི་ལྡོག་ཕྱོགས་མ་རིག་ངོས་འཛིན་གྱི་ཟིན་བྲིས། བསྙེན་སྙུང་གི་སྡོམ་པ་ལེན་ཐབས་རིན་ཆེན་ཐེས་སྐས་སོགས་དབུ་མ་དང་མཛོད་འདུལ་གྱི་སྐོར་གསུང་རྩོམ་ཁག་བཅུ་གཉིས་འཁོད་ཡོད། 
      པོད་བཅུ་པ། ༼གསང་བ་སྔགས་ཀྱི་རྣམ་པར་བཤད་པའི་མཆན་བཀའ་འགྲེལ་གསལ་བྱེད༽ཅེས་པ་འདི་ནི་འགྲེལ་གཞིའི་ཡིག་ཆ་ཐེག་འགྲེལ་མེ་ལོང་དགུ་སྐོར། ཆོ་ག་བཅུ་གཉིས། རྣམ་དག ཁྱབ་པ་སྣང་ལྡན་གྱི་ཐེག་པའི་རབ་དབྱེའི་ལུང་ཚིག ཡེ་ཁྲི་མཐའ་སེལ། མཁས་པ་མི་བཞིའི་ཕྱག་བཞེས། གབ་འགྲེལ། སྤྱི་སྤུངས་ལས་ཐིག་གསང་བའི་འགྲེལ་བ། གཡུང་དྲུང་ལས་རྣམ་པར་དག་པའི་རྒྱུད། ཁྲོད་བོའི་རྒྱུད་དྲུག ཕུར་བུའི་རྒྱུད་དགུ། མ་རྒྱུད་ཐུགས་ཀྱི་ཡང་གབ་ཉི་མའི་རྒྱུད། མ་རྒྱུད་སངས་རྒྱས་རྒྱུད་གསུམ་རྩ་འགྲེལ། མ་རྒྱུད་ཀྱི་དབང་ཁྲིད། རྩ་རྒྱུད་གསང་བ་བསེན་ཐུབ་དང་འགྲེལ་བ་ཡིད་བཞིན་རྣམ་པར་བཀོད་པའི་རྒྱན། འགྲེལ་ཉི་ཟེར་དྲ་བ། གསང་དོན་རྣམ་འབྱེད། གསང་དོན་རྣམ་འབྱེད་ཀྱི་འགྲེལ་བ། གསང་སྔགས་ཀྱི་ཁྲིད་ཡིག་ལྷ་གཉེན་ཤེལ་སྒོང་། དྲང་དོན་མུན་སེལ་སྒྲོན་མ། རིག་འཛིན་འདུས་པ་ཐབས་ཆེན་མཁའ་ཡི་རྒྱུད། སྐལ་བཟང་གི་ཁྲིད་རྒྱུད། དྲན་པའི་ཁྲིད་རྒྱུད། ཁོད་སྤུངས་སྙིང་ཐིག དྲན་པའི་ཐིག་ལེ་བདེ་བའི་ཡེ་ཤེས་བསྐྱེད་པའི་ཡིག་ཆུང་། གཟེར་བུའི་འགྲེལ། མཁས་གྲུབ་གཡུང་དྲུང་ཚུལ་ཁྲིམས་ཀྱི་མཛད་པའི་གསང་སྔགས་ཀྱི་ཕྱག་བཞེས་དང་ལག་ཁྲིད་སོགས་གསང་སྔགས་གཞུང་ཆེན་རྣམས་ཀྱི་དགོངས་པ་གཞིར་བྱས་ཏེ་བཀོད་པའི་གསང་སྔགས་རྒྱུད་སྡེ་བཞིའི་ལམ་རིམ་སྒྲུབ་ཚུལ་རང་ལུགས་ཐུན་མོང་མ་ཡིན་པ་ཞིབ་རྒྱས་སུ་བཀྲལ་བའི་གཞུང་ཆེན་ཞིག་རེད།
      པོད་བཅུ་གཅིག་པ། ༼མ་རྒྱུད་ཀྱི་འགྲེལ་བའི་སྐོར༽ཞེས་པ་འདིའི་ནང་དུ། མ་རྒྱུད་ཡེ་ཤེས་མཆན་འགྲེལ། སྨིན་ལམ་རིན་པོ་ཆེའི་མཆན་འགྲེལ་ཁབ་ལེན་རྡོ་ཡི་མཚོན་ཆ། བར་དོའི་རྣམ་བཤད་གསལ་བཤད་སྒྲོན་མེ། གཤེན་གླུའི་འགྲེལ་བ་ཚངས་པའི་དབུ་རྒྱན། འཇིགས་པ་བརྒྱད་སྐྱོབ་ཀྱི་རྣམ་བཤད་བཅས་གསུང་ཁག་ལྔ་འཁོད་ཡོད།
      པོད་བཅུ་གཉིས་པ། ༼ཟིན་བྲིས་དང་ཆོག་ཁྲིགས་ཀྱི་སྐོར༽ཞེས་པའི་ནང་གསང་སྔགས་ཀྱི་ཕྱག་ལེན་དང་ཟིན་བྲིས། གསོལ་འདེབས་སོགས་གསུང་རྩོམ་ཆེ་ཆུང་སྣ་ཁ་དོན་བརྒྱད་ཙམ་འཁོད་ཡོད།
      པོད་བཅུ་གསུམ་པ། ༼རྫོགས་ཆེན་གྱི་སྐོར༽ཞེས་པའི་ནང་དུ། རྩོད་སྤོང་སྨྲ་བའི་སེང་གེའི་མཆན་འགྲེལ་ལུང་དོན་རབ་གསལ་སྒྲོན་མེ། ཀུན་བཟང་ཐུགས་སྤྲུལ་མའི་འགྲེལ་བ་ལུང་དོན་རབ་གསལ། བྱང་སེམས་གབ་པའི་སྤྱི་ཆིངས་རིགས་པའི་ལམ་བཟང་། དྭོགས་སེལ་འགའ་ཞིག་གླེང་བའི་ལེའི་རིན་ཆེན་གཙག་བུ། ལོ་པཎ་ཤ་རི་དབུ་ཆེན་གྱིས་མཚད་པའི་གལ་མདོ་དན་ཏྲ་ཉི་མའི་འཁོར་ལོའི་བསྡུས་འགྲེལ། གསོལ་འདེབས་དང་བརྟན་བཞུགས་སྨོན་ལམ་སོགས་བླ་མེད་རྪོགས་པ་ཆེན་པོའི་བོན་སྐོར་གསུམ་རྩོམ་ཁག་དྲུག་བཅས་སོ། །

གསུང་འབུམ་ལས་བཤུས།

དཔྱད་གཏམ།

དཔྱད་གཏམ་སྤེལ་བ།
Copyright © 2010 Himalayabon.coM All rights reserved. Powered by: Tibetitw.coM
པར་དབང་ཡོད་ས་ཧི་མ་ལ་ཡའི་བོན་གྱི་དྲ་ཚིགས་ཡིན་པས་ཆོག་མཆན་མ་ཐོབ་པར་བརྒྱུད་འགོད་རིགས་བྱེད་མི་ཆོག