གཙུག་ལག་འབྲས་བུ་དཔལ་འབུམ་དཀར་པོ་གཡུང་དྲུང་ཐེག་པ་ཆེན་པོ་འབྱུང་བ་དུས་ཀྱི་འཁོར་ལོའི་རྒྱུད་ལས། ཐུགས་ཀྱི་ས་བོན་རྣམ་བཅུ་དབང་ལྡན་ཡི་གེ་དགུ་བ་ཀ་བ་བཅུ་བ་འདི། ཨ་གཡུང་དྲུང་ཡེ་དབང་རྒྱལ་བོ་ཀུན་འབུམ་གོ་འབྱེད་སྐུ་གསུམ་ས་ལྷ་སྐུ་མདོན་སེར་པོ། ཡཾ་ཀུན་སྒྲོལ་དབྱིངས་ཕྱུག་སྐུ་གསུམ་རླུང་ལྷ་ལྗང་ཁུ། རཾ་ཀུན་རིག་འབར་བ་སྐུ་གསུམ་མེ་ལྷ་དམར་པོ། མཾ་ཀུན་འཇོམས་རྒྱལ་བོ་་ནང་སེལ་སྲས་དྲལ་བརྒྱད་སྐུ་གསུམ་ཆུ་ལྷ་སྔོན་པོ། ཁཾ་ཀུན་འདུས་ཆེན་པོ་དྲི་སྲས་ང་རྒྱལ་ལྕགས་ལྷ་དཀར་པོ། བྲུཾ་གཞལ་ཡས་སྲུང་གུར་དང་བསྙེམ་བྱེད་མ་གཞི་སེར་པོ། ཧཱུྃ་ནང་སྒོའི་དུས་གཞི་རྒྱལ་མོ་དང་། བར་སྒོ་སྲུང་བའི་ལྷ་བཞི། ཕྱི་སྒོའི་ཁྲོ་བོ་བཞི་བཅས་མཐིང་སྔོན། གཡས་ཀྱི་ཨཱོྃ་ནི་ཡེ་སྲིད་མྱེས་པོ་སངས་པོ་འབུམ་ཁྲི་ལས་སོགས་ཡེ་སངས་སྲིད་པ་རིགས་བཞི་སྐུ་མདོག་དཀར་པོ། གཡོན་གྱི་འདུ་ནི་སྟོང་ཁྱབ་ཡུམ་ཆེན་དང་། རྒྱུ་ཡི་ཡུམ་བཞི་གཤེན་བརྒྱད་དམར་སེར། མདོར་ན་ཡེ་དབང་རིགས་ལྔའི་ལྷ་ཚོགས་བདུན་བརྒྱ་ཉི་ཤུའི་ས་བོན་འདིར་འདུས།
རྣམ་བཅུ་དབང་ལྡན་གྱི་ཕན་ཡོན་ནི། འབྱུང་བའི་འཇིགས་པ་སྟེ་ས་གཡོས་ཀྱི་འཇིགས་པ་དང་ཆུའི་འཇིགས་པ། རླུང་གི་འཇིགས་པ། མེའི་འཇིགས་པ་ལ་སོགས་ལས་སྐྱོབ་པ་དང་། དེ་བཞིན་ལྷ་སྲིན་གདུག་རྩུབ་ཞི་བ། རིགས་དྲུག་སྦྱིན་པས་ཚིམས་པ། མཚོན་གྱི་བསྐལ་བ་བརླག་པ། དུས་ཀྱི་འཁྲུག་པ་ཞི་བ། མི་ནད་ཕྱུགས་ནད་ཐམས་ཅད་རྒྱུན་ཆད་པ་ལ་སོགས་དང་། ཆར་ཆུ་དུས་སུ་འབེབ་པ་དང་། ལོ་ཕྱུགས་རྟག་ཏུ་ལེགས་པ། སེམས་ཅན་ཐམས་ཅད་ལ་བདེ་སྐྱིད་ཕུན་སུམ་ཚོགས་པའི་བསྐལ་བ་དང་ལྡན་པར་འགྱུར་རོ། །