ཧི་མ་ལ་ཡའི་བོན།-རྗེ་༧རྒྱལ་བ་སྨན་རི་བ་ཀུན་མཁྱེན་ཉི་མའི་ཞལ་འདམས།

རང་རེའི་བོན་ལུགས་བསྟན་པ་མི་དར་ཞིང་། ། བྱས་པ་མེད་པར་མི་ཁས་སྡང་བ་ནི། ། དགེ་ལེགས་འབྱུང་བ་དཔལ་ལྡན་བླ་མ་ལ། ། བསྟོད་བཀུར་མ་བྱས་བཀའ་དམ་མ་བསྲུང་པས། ། ཉེས་པ་ཆེན་པོ་དེ་ཡིས་བསྐྱེད་པར་མཐོང་། ། དེ་ཕྱིར་དགེ་སྒྲུབ་བོན་ལ་སྤྱོད་པ་ཀུན། ། རྣལ་འབྱོར་ཆེ་བ་རྣམ་བཞིར་རྒྱུན་དུ་བླངས། ། འདི་ལ་དོན་གནད་ཆེན་པོ་ངེས་པར་མཐོང་། ། རྣལ་འབྱོར་ཆེ་བ་རྣམ་བཞིར་གསུངས་པ་ནི། ། བླ་མར་དད་འདུན་མོས་གུས་ཆེ་བ་དང་། ། གདམས་ངག་བོན་ལ་ཡིད་ཆེས་ཆེ་བ་དང་། ། མཆེད་གྲོགས་རྣམས་ལ་དག་སྣང་ཆེ་བ་དང་། ། སེམས་ཅན་སྤྱི་ལ་སྙིང་རྗེ་ཆེ་བ་དང་། ། འདི་བཞི་མ་བརྗེད་ངེས་པར་ཟུངས་སུ་བཟུང་། ། འདི་བཞི་བོན་སྤྱོད་ཀུན་ལ་ལྡན་གྱུར་ན། ། བོན་བསྟན་དར་རྒྱས་འཕེལ་བ་དངོས་སུ་མཐོང་། ། གཞན་ཡང་དབང་ལུང་འབྲེལ་བ་ཞུས་ཕྱིན་ནས། ། ཡོན་ཏན་ཆེ་བ་མེད་པ་མཐོང་གྱུར་ཀྱང་། ། ལྟ་ལོག་བསྐུར་འདེབས་སོམ་གཉིས་རྣམ་པར་སྤོངས། ། རྩ་བའི་བླ་མར་སྒོམ་ནས་དམ་ཚིག་སྲུངས། ། ཕྱི་རབས་འགྲོ་ལ་དབང་ལུང་བྱིན་བྱེད་དུས། ། བླ་མ་རྒྱལ་བའི་རྒྱལ་ཚབ་ཏུ་བསྐོས་ཕྱིར། ། བླ་མ་ངན་ཀྱང་རྒྱལ་བས་དབྱིངས་ནས་གཟིགས། ། གཟིགས་པའི་ཐུགས་རྗེས་བཟུང་ཕྱིར་དག་སྣང་སྒོམས། ། སངས་རྒྱས་ཐ་མལ་བདག་འདྲས་མཐོང་མིན་ཕྱིར། ། བླ་མ་དག་ལ་ལྷག་བསམ་མོས་འདུན་བསྐྱེད། ། བླ་མ་བཀུར་ཚུལ་མདོར་བསྡུས་སྔགས་རྒྱུད་ལས། ། དགེ་ལེགས་ཀུན་གྱི་འབྱུང་གནས་བླ་མ་སྟེ། ། མིག་སྙིང་སྲོག་དང་འདྲ་བ་གཅེས་པར་ཟུངས། ། སྐུ་ཡི་ཡོན་ཏན་སྨད་ན་སྲིན་པོར་སྐྱེ། ། གསུང་གི་བར་ཆད་ལྐུགས་པ་ཁ་མེད་འགྱུར། ། ཐུགས་དཀྲུག་དམྱལ་བ་གཅོད་སྦྱོང་དམྱལ་བར་སྐྱེ། ། ཡོན་ཏན་བརྒྱ་ཕྲག་བཅུ་དྲུག་མང་པོ་ལ། ། ལོག་ལྟ་སྐྱེས་ན་གཅོད་སྦྱོང་དམྱལ་བར་སྐྱེ། ། སྐུ་ཡི་གྲིབ་འགོམ་མུན་ནག་གླིང་དགུར་འཁྱམས། ། རྒྱབ་དང་ཟུར་བསྟན་སྒུར་དང་འཁྱོག་པོར་འགྲོ། ། གབ་སྦས་བྱས་ན་མིག་མེད་ལོངས་པར་སྐྱེ། ། ཞེས་སོགས་ལུང་ལས་གསུངས་པའི་དོན་ལ་སོམས། ། དམ་ཚིག་མ་སྲུང་རྩ་བླར་མ་སྒོམ་ན། ། དབང་འབྲེལ་ལུང་འབྲེལ་མ་ཞུས་རྒྱང་ནས་བྱོལ། ། སྐྱོན་དང་ཡོན་ཏན་གང་ཡང་བྱུང་བ་མིན། ། དེ་ཕྱིར་དམ་ཚིག་སྲུང་ཡུལ་རུང་མིན་ནི། ། ལེགས་པར་བརྟགས་ནས་དབང་ལུང་ཞུས་པ་ཡིན། ། མདོར་ན་རྩ་བའི་བླ་མའི་དམ་ཚིག་ནི། ། སྲུང་ལ་གནད་དོན་ཆེན་པོ་ངེས་པར་མཐོང་། ། བསྲུང་བྱའི་དམ་ཚིག་ཆེན་པོ་འདི་ཉམས་ན། ། དམྱལ་བ་ཆེན་པོར་འགྲོ་བ་ཐག་གིས་ཆོད། ། འཐད་པ་དགོངས་ན་ཐུགས་ལ་བསྟི་བར་ཞུ། ། མི་འཐད་དགོངས་ཀྱང་དམྱལ་བ་བསྒྲུབ་མི་འཚལ། ། ཞེས་པ་གྲུབ་དབང་མཆོག་གིས་བཀའ་ཕེབས་དང་། དྲང་སྲོང་བསྟན་པ་ཡེ་ཤེས་བཀའ་གསུང་གྱེན་ལྡོག་མ་ནུས་ཐོས་ཆུང་པ་ཉི་རི་ཤེལ་ཞིན་ཟུར་རླུང་ཝེར་རོ་ཡིས་ཉམས་སྣང་སེམས་ལ་གང་ཤར་བྲིས་པ་དགེ། །

དཔྱད་གཏམ།