ཟབ་རྒྱས་གཤེན་བསྟན་དགོས་འབྱུང་བྱེ་བའི་གཏེར།།
འཛམ་གླིང་རྐྱེ་རྒུའི་དཔལ་དུ་ངོམ་པའི་འཕྲུལ།།
ཧི་མ་ལ་ཡ་བོན་གྱི་དྲ་ཚིགས་ཞེས།།
ཤེས་བྱའི་མེ་ཏོག་གསར་དུ་བཞད་འདི་རྨད།།
གོ་ལའི་ཁྱོན་གྱི་རིག་གཞུང་ཀླུང་བཞིའི་རྒྱུན།།
ཐོག་མའི་བྱེད་པོ་ལྷུན་པོ་ཏི་སེ་ཡི།།
ཡིད་འོང་གཟི་བྱིན་འཆར་བའི་མེ་ལོང་སྟེ།།
ཧི་བོན་དྲ་ཚིགས་འདི་ཀོ་ཨེ་མ་རྨད།།
ཁྱོད་ནི་ཡབ་མྱེས་བོན་གྱི་སྐད་གསང་སྒྲོག་པའི་གཡུ་འབྲུག་ཡིན།།
ཁྱོད་ནི་གངས་དཀར་རི་བོའི་ཞེ་འདུན་ཁུར་བའི་གཡག་རྒོད་ཡིན།།
ཁྱོད་ནི་སྔོན་ཐོན་གྲལ་དུ་མགྱོགས་ཀྱིས་བསྐྱོད་པའི་རྟ་མཆོག་ཡིན།།
ཁྱོད་ནི་ང་ཚོ་ཚང་མའི་ལས་དབང་བསྟོད་པའི་རླུང་རྟ་ཡིན།།
ཞེས་ཀོ་རྒྱལ་བཤད་གྲྭ་ནས་ཁྱུང་སྨྱུག་མཛེས་ཀྱིས༼ཧི་མ་ལ་ཡའི་བོན༽གྱི་དྲ་ཚིགས་སྤེལ་བར་བཀྲ་ཤིས་ལེགས་སྨོན་དང་ལས་བྱེད་མི་སྣ་ཡོངས་ལ་ཁ་དགེའི་སྨོན་འདུན་ཞུ་ཞུ།