གཤེ༵ན་རབ་ཀུན་གྱི་མཆོག་གྱུར་ཐོད་དཀར་སྲ༵ས། །
སྲ༵ས་མཆོག་དེ་ཡི་བརྒྱུད་འཛིན་དབྱིག་གི་ནོ༵ར། །
ནོ༵ར་བུ་ཀུན་ལས་རྣམ་རྒྱལ་དམུ་རིགས་བུ༵། །
བུ༵་རྒྱུད་དྲི་བྲལ་སྲིད་གསུམ་ཡོངས་ལ་དབ༵ང་། །
དབ༵ང་འགྱུར་འཁོར་ལོས་ཉོན་མོངས་ཀུན་ལས་རྒྱ༵ལ། །
རྒྱ༵ལ་བསྟན་ཉིན་མོར་བྱེད་ལ་མཆོད་ཅིང་བསྟོད། །
ཅེས་པའི་མཁྱེན་གསོལ་གྱི་གདུང་དབྱངས་ཤོ་ལོ་ཀ་དེ་ཡིས་མདུན་བསུས་ཏེ་ཞུས་ན། དམུ་རིགས་གཤེན་གྱི་བསྟན་པའི་བདག་ཉིད་ད་ལྟའི་སྐུ་འཚོ་བཞུགས་ཀྱི་སྐྱབས་རྗེ་དམ་པ་གཤེན་སྲས་རིན་པོ་ཆེ་སྤྲུལ་སྐུ་ཉི་ཟླ་དབང་གྲགས་མཚན་ནམ་ནོར་བུ་དབང་རྒྱལ་མཆོག་ནི། རིགས་སྲས་དམ་པ་རྒྱལ་བའི་མྱུ་གུ་སྟེ། མཆོག་ཉིད་ཀྱི་ཕྱི་ནང་གསང་གསུམ་གྱི་རྣམ་ཐར་བསམ་གྱི་མི་ཁྱབ་པ་རྣམས། བདག་འདྲའི་སོ་སྐྱེ་ཕལ་པ་ཞིག་གིས་དཔྱོད་ཡུལ་གཏན་ནས་མིན་ནའང་། སྐྱབས་རྗེ་བླ་མ་དམ་པ་འདི་ཡིས་བསྟན་འགྲོའི་ཆེད་དུ་རླབས་ཆེན་གྱི་མཛད་འཕྲིན་རྒྱ་ཆེན་བསྐྱངས་པ་ལས་ཐུན་མོང་ཕྱི་ཡི་རྣམ་ཐར་སྐོར་ཞིག་གུས་པས་བསྐུལ་བར་བརྟེན་ཁོང་ཉིད་ཀྱིས་གསུང་གི་བཀའ་བསྩལ་གནང་བ་གཞིར་བཟུང་ནས་སྒྲོ་སྐུར་སོགས་ཀྱི་མ་ལྷད་པར་དྲང་བརྗོད་ཀྱི་ལམ་ནས་ཕྱི་རབས་པ་རྣམས་ལ་གསོལ་འདེབས་སམ་བཀའ་དྲིན་རྗེས་དྲན་གྱི་རྟེན་དུ་ལོ་རིམ་གྱི་སྒོ་ནས་ཆུ་ བོའི་ཞུར་རྒྱུན་བཞིན་རྣམ་ཐར་མདོར་བསྡུས་ཤིག་འགོད་པར་བྱ་བ་ལ་སྤྲོ་བ་སྐྱེས།
དེ་ཡང་གང་ཉིད་ཀྱི་འཁྲུངས་ཡུལ་ནི། ལུང་ལས། རྒྱལ་བ་གཤེན་གྱི་གདུང་འཛིན་དུ། གཤེན་སྲས་ནོར་དབང་བྱ་བ་འབྱུང་། ཅེས་གསུངས་པ་ལྟར་སྐལ་བཟང་རྣམ་འདྲེན་བརྒྱད་པ་རྫོགས་པའི་སངས་རྒྱས་གཤེན་རབ་མི་བོ་ཆེའི་གདུལ་ཞིང་འཛམ་གླིང་བྱེ་བ་ཕྲག་བརྒྱར་གནས་པའི། གངས་དཀར་ར་བའི་ལྗོངས་ཆེན་ཆོལ་ཁ་གསུམ་དུ་བྱས་པའི་དབུས་གཙང་རུ་བཞིའི་ཆོལ་ཁའི་ནང་ཚན། གཡས་རུ་འཇེད་ཀྱི་ས་གནས། སྟོད་ཀྱི་གདན་ས་ཆེན་པོ་བྲུ་ཞུ་སྤ་རྨེའུ་སྤྱི་ཕུད་གཤེན་དང་རྣམ་ལྔའི་ཡ་གྱལ། དཔལ་སངས་རྒྱས་གཡུང་དྲུང་བོན་གྱི་བསྟན་པ་རིན་པོ་ཆེ་བརྒྱུད་འཛིན་དར་སྤེལ་བྱེད་སའི་ལྟེ་གནས། བཞད་ཀྱི་དཔལ་ལྡན་དར་སྡིངས་ཞེས། སྔོན་རབས་དུས་སུ་བོན་གྱི་འདུ་གནས་སོ་བདུན་དུ་གྲངས་པའི་ནང་ཚན་ཕྲིན་ལས་འགྲོ་འདུལ་སྤྲུལ་པའི་གནས། སྒྲུབ་སྡེ་སོ་བདུན་གྱི་ཡ་གྱལ་རི་བོ་གླང་ཆེན་འགྱིང་འདྲའི་གནས་ཀྱི་མདུན་རོལ་དུ་བརྗིད་ཆགས་ཉམས་དགའི་གནས་ཆེན་གསེར་སྒོ་ཁྲ་མོའི་འདབས་སུ་ཞྭ་དཀར་གཡུང་དྲུང་བོན་གྱི་བསྟན་པའི་མངའ་བདག་བདག་ཅག་གི་རྣམ་འདྲེན་རྫོགས་པའི་སངས་རྒྱས་ཀྱི་གདུང་རྒྱུད་འཁྲུལ་བ་མེད་པ་གསེར་གྱི་ཉག་ཐག་ལ་རིན་པོ་ཆེའི་ཕྲེང་བ་བརྒྱུས་པ་ལྟར་གནས་པའི་བྱིན་རླབས་ཀྱི་ཚན་ཁ་མ་ཉམས་པར་རིས་མེད་འགྲོ་བ་ཡོངས་ཀྱི་སྐྱབས་མགོན་གཡུང་དྲུང་བོན་གྱི་བསྟན་པའི་མངའ་བདག་རྒྱལ་བ་སྲས་དང་བཅས་པའི་རྣམ་རོལ་རྒྱུན་མ་ཆད་པར་འཁྲུངས་པའི་རྒྱལ་རིགས་གཤེན་ཚང་ངམ་དམུ་རིགས་གཤེན་གྱི་སྐྱེས་ཆེན་དམ་པ་རྣམས་པའི་འཁྲུངས་གནས་གཤེན་ཚང་ཕོ་བྲང་དུ་ལུང་ཟིན་གྱི་སྐྱེས་ཆེན་དམ་པ་ཡབ་གཤེན་ཆེན་ཉི་མ་འབུམ་གསལ་དང་། ཡུམ་མཐོང་སྨོན་དབུ་མཛད་ལྷ་བའི་སྲས་མོ་བསྟན་འཛིན་མཚོ་རྒྱལ་གཉིས་ཀྱི་སྲས་སུ་བོད་རབ་བྱུང་བཅུ་དྲུག་པའི་མེ་ཕོ་སྤྲེལ་ལོ་སྟེ་སྤྱི་ལོ་༡༩༥༦ལོར་དགེ་ལེགས་ཀྱིས་རྟགས་མཚན་དུ་མ་དང་བཅས་གཟུགས་སྐུ་མངོན་པར་འཁྲུངས། ཆུང་ནས་རྒྱུད་དུལ་བ་དང་། རང་གཤིས་བཟང་བ་སོགས་སྐྱེས་བུ་དམ་པའི་ངང་ཚུལ་རང་བཞིན་ལྷན་སྐྱེས་སུ་མངའ་བ་དང་། སྤྲུལ་པའི་སྐུ་མཆོག་ཁྱད་དུ་འཕགས་པའི་ཡོན་ཏན་དུ་མ་རྒྱུད་ལ་ལྡན་པ་སྟེ་རྒྱལ་བའི་སྲས་མཆོག་ནོར་བུ་དབང་གི་རྒྱལ་པོ་ཞེས་མཚན་གསོལ་མཛད། རྒྱལ་བའི་སྐུ་སྲས་ཡིན་པའི་རྟགས་སུ་ཆུང་བྱིས་པའི་སྐུ་དུས་ནས་ཀྱང་མངོན་ཤེས་ལ་ཐོགས་པ་མེད་པ་ནི་ད་ལྟ་དར་སྡིངས་ཀྱི་རྒན་རབས་རྣམས་པས་གསུངས་རྒྱུན་མི་འདྲ་བ་བརྗོད་ཀྱིས་མི་ཚར་བ་མང་པོ་འདུག
སྤྱི་ལོ་༡༩༦༠ལོར་དགུང་ལོ་ལྔར་ཕེབས་སྐབས་རི་རྒྱལ་དགོན་ཁྲི་བརྟན་ནོར་གླིང་གཙུག་ལག་ཁང་དུ་གཤེན་གྱི་བླ་བརྒྱུད་རིམ་བྱོན་གྱི་གསེར་ཁྲི་ལ་ཞབས་གསོལ་གདན་ཞུས་མཛད་པའི་སྐབས། མཁན་ཆེན་བསྟན་འཛིན་རྒྱལ་མཚན་གྱིས་དམུ་རྒྱལ་གཤེན་ལ་རྩེ་གཅིག་དད་པའི་སྒོ་ནས་ཕུལ་བས་སྐུ་ཚེ་འཕོ་མེད་རྒྱུན་རིང་བརྟན་པའི་ཆེད། གསོལ་འདེབས་འདི་ལྟར་གསུངས་ཏེ།
ཨེ་མ་ཧོ། རྒྱལ་བསྟན་ཉིན་བྱེད་གསེར་གྱི་ལྷ་ལམ་ལས། །
རྒྱལ་སྲས་རྣམ་རོལ་ལོང་སྐུའི་ཉི་ཤར་བས། །
རྒྱལ་བསྟན་གསལ་ཞིང་སྐྱེ་དགུའི་གཙུག་རྒྱན་མཆོག །
རྒྱལ་གཤེན་གདུང་འཛིན་བསྐལ་བརྒྱར་ཞབས་བརྟན་ཤོག །
ཅེས་གསུངས་ཡོད་པ་གཤེན་གྱི་ཚོགས་འདོན་ནང་གསལ། དེའི་རྗེས་ལོ་འགའ་ཤས་ཡབ་ཡུམ་གྱི་ལྷན་དུ་དང་པོའི་ཡི་གེ་ཀློག་འདོན་སོགས་འགོ་ཙམ་སྟེ་བཞུགས་རྒྱུ་བྱུང་རུང་དེ་ནས་མི་རིང་བར་ཁྱོན་ཡོངས་ནས་དུས་འགྱུར་ཆེན་པོའི་ཟང་ཟིང་འགོ་ཚུགས་ཏེ། ཡབ་དང་དཔོན་གཡོག་རྣམས་སྨད་ཕྱོགས་སུ་ཕེབས་རན་ཏེ་ཡུམ་དང་གཤེན་སྲས་ཁོང་གཉིས་ལྷན་དུ་ཕེབས་རྒྱུར་ཟན་རྟགས་བསྒྲིལ་ཏེ་སྒྲུབ་ཁང་དུ་ཡི་དམ་ལྷ་དང་སྲུང་མའི་ཚོགས་རྣམས་ལ་རྟགས་ལུང་ཞུས་པས་ཡུམ་སྲས་གཉིས་གདན་ས་རང་དུ་བཞུགས་རྒྱུར་ཐུགས་ཐག་བཅད་ཐོག ཡབ་དང་དཔོན་འཁོར་རྣམས་ཧོར་སོག་སྡེ་ཕྱོགས་སུ་ཕེབས་ཁར་སྐྱང་ནག་འཚམས་པ་ཨ་ཁུ་མཐའ་ཡས་རྒྱ་མཚོ་རིན་པོ་ཆེ་མཆོག་ལ་འདི་ལྟར་གསུངས། མ་འོངས་མངོན་གཟིགས་ཀྱིས་ཁྱེད་རང་དུས་འགྱུར་སྐབས་སུ་སྐྱོན་ཆག་ཡོང་གི་མ་རེད། གཙང་དུ་ངའི་བུ་སྤྲེལ་ལོ་བ་ཞིག་ཡོད་པས་རྗེས་སུ་ཁྱེད་ཀྱི་ཐུགས་ལ་བཞག་ཏེ་གཟིགས་རྟོག་གནང་རོགས་དགོས་ཞེས་བཀའ་མངགས་ནན་གྱིས་གནང་སྟེ་ཁོང་རྣམས་དུས་དེ་ནས་ཞལ་གྱེས་གནང་། དེ་རྗེས་ཡུམ་སྲས་གཉིས་རིག་གསར་སྐབས་ཀྱི་རླུང་འཚུབ་དྲག་པོའི་ཁྲོད། ལོ་བཅུ་ལྷག་ཙམ་རིང་འཁྱགས་ལྟོགས་བཀྲེས་སྐོམ་གྱི་སྡུག་བསྔལ་སྣ་ཚོགས་མྱོང་དགོས་བྱུང་བ་ལས་ཐུན་མིན་མདོ་སྔགས་སེམས་གསུམ་དང་ཐུན་མོང་རིག་པའི་གནས་སོགས་ལ་སྦྱངས་པ་མཛད་རྒྱུ་ནི་དེ་བས་བརྗོད་ཐབས་བྲལ། ལྕགས་ཕོ་ཁྱི་ཡི་ལོ་དགུང་ལོ་བཅོ་ལྔ་བཞེས་ཏེ་སྤྱི་ལོ་༡༩༧༠ནས་ལོ་ལྔ་ཙམ་གྱི་ནང་དཀའ་སྡུག་གི་ཁྲོད་སྔ་ཕྱིར་ཡུམ་དང་ལྷན་དུ་ཆུ་ལྷོ་གཞུང་དང་གཞིས་རྩེ་སོགས་ས་ཆ་གང་སར་ཕེབས་དགོས་བྱུང་བ་དང་། དེའི་རྗེས་ཡུམ་སྐུ་ན་ཕྲ་བའི་དུས་ནས་དཀའ་སྡུག་ཤིན་ཏུ་ཆེ་བར་བརྟེན་དགོངས་པ་རྫོགས། ཆུ་ཕོ་བྱི་བའི་ལོ་སྟེ་དགུང་ལོ་བཅུ་བདུན་ཙམ་ནས་ཁོང་གཅིག་པུར་ལུས་པ་དང་འཚོ་བ་སོགས་གང་ཅིར་དཀའ་ངལ་ཧ་ཅང་ཆེན་པོ་བྱུང་བར་བརྟེན་མུས་ལུང་སོགས་སུ་ཕེབས་པའི་སྐོར་གྱི་སྐུ་ངལ་བྱུང་ཚུལ་སེམས་གྱི་མི་བཟོད་པ་མང་དག་ཅིག་གསུང་རྒྱུ་འདུག་ཀྱང་རེ་རེ་བཞིན་བརྗོད་ཀྱིས་མི་ཚར་བ་དང་ཡིག་ཚོགས་ལ་འཇིག་སྟེ་མ་བྲིས། མི་དམངས་ཀུང་ཧྲེའི་སྐབས་དར་སྡིངས་སུ་རུ་ཁག་གཉིས་པའི་ཕྱུགས་རྫི་གནང་སྟེ་བཞུགས། ཤིང་ཕོ་སྟག་གི་ལོ་སྤྱི་ལོ་༡༩༧༤དགུང་ལོ་བཅུ་དགུ་བཞེས་སྐབས་སྙུང་ཞི་དང་སྐུ་ངལ་གཉིས་ཀྱི་མ་བཟོད་པར་ཁོང་གཅིག་པུ་གཞིས་རྩེར་རྐང་ཐང་དུ་ལན་གཉིས་ཙམ་ཕེབས། མེ་ཕོ་འབྲུག་གི་ལོ་སྤྱི་ལོ་༡༩༧༦ནས་ལོ་གཉིས་ཙམ་གྱི་རིང་ལ་བཀྲ་ཤིས་ལྷུན་པོར་སྤོ་བོ་རྒུ་འགྲུམ་ལགས་ཀྱི་ཤག་ཏུ་བཞུགས། མེ་མོ་སྦྲུལ་གྱི་ལོ་དགུང་ལོ་ཉི་ཤུ་རྩ་གཉིས་ཕེབས་ཏེ་སྤྱི་ལོ་༡༩༧༧ལོའི་ལོ་མཇུག་ཏུ་མཐའ་ཡས་རྒྱ་མཚོ་རིན་པོ་ཆེ་མཆོག་གིས་ཁོང་རང་གི་ཚ་བོ་དང་ཨ་མདོ་མི་ཁ་ཤས་གཞིས་རྩེར་གཤེན་སྲས་གདན་འདྲེན་ཞུ་བར་མངགས། ཁོང་རྣམས་གཞིས་རྩེར་ཕེབས་ཏེ་གང་སར་བཙལ་བས་གཤེན་སྲས་སྨན་ཁང་དུ་བཞུགས་ཡོད་པ་ཤེས་རྗེས་ཁོང་གིས་སྨན་པ་དང་དམངས་སྲིད་ཅུས་བཅས་ཚང་མར་གཤེན་སྲས་ལྷ་སར་ཁྲིད་རྒྱུའི་རེ་ཞུ་བྱས་རྗེས་ཁོང་རྣམས་ལྷ་སར་ཕེབས་ཏེ་ཨ་ཁུ་ཡི་དམ་གྱི་ནང་དུ་ཉིན་ཤས་བཞུགས་པ་དང་། དེ་དུས་མཐའ་ཡས་རིན་པོ་ཆེ་ལས་མིར་ཐོན་པ་དང་། ཁོང་གིས་ལས་ཞོར་དུ་གཤེན་སྲས་མཆོག་གི་འཚོ་བ་སོགས་གང་ཅིར་ཐུགས་དགོངས་ཟབ་བཞེས་གནང་བ་དང་སྲིད་རྒྱལ་དྲེའུ་དམར་དང་བྱམས་མ། མ་རྒྱུད་ཀྱི་གསོལ་འདེབས་ལ་སོགས་འདོན་ཆ་བསླབ་གནང་བ་དང་དབང་ལུང་ཁྲིད་བཅས་གནང་བྱུང་གསུངས། དགུང་ལོ་ཉི་ཤུ་རྩ་གསུམ་ཕེབས་པ་ས་ཕོ་རྟ་སྤྱི་ལོ་༡༩༧༨ལོར་ཏང་གི་ཆོས་ལུགས་དད་མོས་སྲིད་ཇུས་རང་དབང་མངོན་འགྱུར་གྱི་དཔྱིད་རླུང་དལ་པོ་བག་ཕེབས་ཀྱི་སྒོ་ནས་གངས་རིའི་ལྗོངས་འདིར་ལྡང་རྗེས་ལོ་དེར་མཐའ་ཡས་རྒྱ་མཚོ་མཆོག་དང་ཨ་མདོ་འཇིག་མེད་བཅས་ལྷན་དུ་ཀོང་པོར་ཕེབས་ཏེ་གནས་མཆོག་བོན་རིར་བསྐོར་བ་གཅིག་སྐྱོན་གནང་སྟེ་ལྷ་སར་ཕྱིར་ཕེབས། ས་མོ་ལུག་དགུང་ལོ་ཉི་ཤུ་རྩ་བཞིར་ཕེབས་ཏེ་སྤྱི་ལོ་༡༩༧༩ལོར་མཐའ་ཡས་རྒྱ་མཚོ་མཆོག་དང་ཚ་རོང་སྤྲུལ་སྐུ་སྦྱིན་པ་རྒྱལ་མཚན་རྣམ་གཉིས་ལྷན་དུ་གཡུང་དྲུང་གླིང་དུ་ཕེབས་ཏེ་དུ་ཏྲི་སུའི་སྒྲུབ་པ་ཟླ་བ་གཅིག་ལྷག་ཙམ་བཞུགས་ཏེ་སླར་ཕྱིར་ལྷ་སར་ཕེབས། ལྕགས་མོ་བྱ་དགུང་ལོ་ཉི་ཤུ་རྩ་དྲུག་བཞེས་ཏེ་སྤྱི་ལོ་༡༩༨༡ལོར་སྨན་རིའི་མཁན་དཔོན་སློབ་རྣམ་གཉིས་དང་ཨ་ཁུ་མཐའ་ཡས་རྒྱ་མཚོ་རྣམས་ཀྱིས་གཙོས་པའི་ཕྱོགས་མཚམས་ནས་བཞུགས་པའི་བོན་གྱི་བླ་སྤྲུལ་རྣམས་ཀྱིས་ཐུགས་དགོངས་ཟབ་བཞེས་མཛད་དེ་རིགས་བཟང་ཁུངས་བཙུན་ཞིང་མཚན་རྟགས་དང་ལྡན་པའི་བུ་མོ་བདུན་ཙམ་ཞིག་བོན་གཞིས་ཐོབ་རྒྱལ་གསར་པའི་སྒྲུབ་ཁང་ནང་དུ་བོན་སྐྱོང་གན ད་སྒྲུབ་ཀྱི་ཟན་རྟགས་བསྒྲིལ་ཏེ་ད་ལྟའི་གཤེན་སྲས་རྣམས་པའི་མ་ཡུམ་ཡེ་ཤེས་མཁའ་འགྲོ་ཉི་མ་མཚོ་མོ་རྟགས་ལུང་བཞིན་དང་པོར་དོན་ཏེ་ལྕམ་དུ་བཞེས། ཆུ་ཕོ་ཁྱི་ཡི་ལོ་དགུང་ལོ་ཉི་ཤུ་རྩ་བདུན་སྤྱི་ལོ་༡༩༨༢ལོར་གཞིས་རྩེ་ས་གནས་ཆོས་ཚོགས་ཀྱི་ལས་འཛིན་དུ་བཞུགས། ཆུ་མོ་ཕག་གི་ལོ་དགུང་ལོ་ཉི་ཤུ་རྩ་བརྒྱད་བཞེས་ཐོག་སྤྱི་ལོ་༡༩༨༣ལོར་གདན་ས་དར་སྡིངས་སུ་ཆོས་འགོ་དར་ཚུན་གྱི་ཕེབས་ཐེངས་དང་པོ་བསྐྱངས་ཏེ་ཁྲི་བརྟན་ནོར་རྩེར་སྒེར་སྲུང་བཙན་རྒྱལ་ཐོག་རྒོད་འབར་བའི་བཞུགས་ཁང་གསར་བཞེངས་གནང་བ་དང་། གསེར་སྒོ་ཁྲ་མོ་གཞིག་ཤུལ་དུ་བསྟན་པའི་དར་ཆེན་ཞིག་བཙུགས་གནང་སྟེ་མ་འོངས་པར་སངས་རྒྱས་བསྟན་པ་དར་ཞིང་རྒྱས་པ་ཡོང་བའི་ཐུགས་སྨོན་མཛད་དེ་ཉིན་ཞག་འགའ་ཤས་བཞུགས། ཤིང་མོ་གླང་སྤྱི་ལོ་༡༩༨༥ལོར་གཤེན་གྱི་གདན་ས་དཔལ་ལྡན་དར་སྡིངས་སུ་གཤེན་ཚང་བླ་བྲང་ཕྱི་ནང་ཚང་མ་གསར་བཞེངས་ལེགས་པར་མཛད། མེ་མོ་ཡོས་སྤྱི་ལོ་༡༩༨༧ལོར་དགུང་གྲངས་སུམ་ཅུ་སོ་གཉིས་ཐོག་གནས་ཆེན་གསེར་སྒོ་ཁྲ་མོ་ཐོག་མའི་གསར་བཞེངས་ཀྱི་རྨང་གཞི་གཏིངས་གནང་བ་དང་ལོ་དེར་གཞིས་རྩེ་ས་གནས་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པ་གནང་བ་དང་། ལོ་དེར་པན་ཆེན་རིན་པོ་ཆེ་གཞིས་རྩེར་ཕེབས་པ་དང་། པན་ཆེན་རིན་པོ་ཆེ་མཆོག་དང་མཇལ་འཕྲད་གནང་ཞིང་པན་ཆེན་རིན་པོ་ཆེ་མཆོག་ནས་ཁོང་ལ་མཐོང་ཆེན་གནང་སྟེ། གཤེན་ཐུགས་རྗེ་ཉི་མའི་སྐབས་སུ་ཁོང་དར་སྡིངས་སུ་ཕེབས་མྱོང་ཚུལ་གསུངས་ཤིང་། གཞིས་རྩེ་ས་གནས་ཀྱི་དབུ་ཁྲིད་རྣམས་ལ་གཤེན་སྲས་ཁོང་ལ་ལྟ་རྟོག་དང་གཟིགས་སྐྱོང་ཡག་པོ་གནང་དགོས་པའི་བཀའ་སློབ་གནང་། དེ་དུས་ལྷ་སར་གཤེན་ཚང་གི་ཕྱག་མཛོད་ཚེ་དབང་རྡོལ་ལགས་ཀྱི་གཟིམ་ཁང་དུ་ལྷན་བཞུགས་ལོ་ཁ་ཤས་མཛད། ས་ཕོ་འབྲུག་སྤྱི་ལོ་༡༩༨༨ལོར་རག་ཤི་རྟོགས་ལྡན་དྲི་མེད་གཡུང་དྲུང་གི་སྐུ་མདུན་ནས་སྔོན་འགྲོའི་ཁྲིད་ལུང་དང་སྲིད་རྒྱལ་དྲེའུ་དམར་གྱི་བཀའ་གཏད་རྗེས་གནང་དང་བཅས་པ་ཞུ་གནང་མཛད་པ་དང་། ལོ་དེར་དར་སྡིངས་སུ་ཕེབས་ཏེ་ཁྲི་བརྟན་ནོར་བུ་རྩེའི་འདུས་སྡེ་བླ་སློབ་རྣམས་ལ་བྱིན་རླབས་རྗེས་གནང་དང་། བསྟན་པ་འཛིན་སྐྱོང་སྤེལ་གསུམ་གྱི་བཀའ་སློབ་ལམ་སྟོན་བཅས་གནང་། ཆུ་ཕོ་སྤྲེལ་སྤྱི་ལོ་༡༩༩༢ལོར་སྐྱབས་རྗེ་སྨན་རིའི་ཡོངས་འཛིན་བསྟན་འཛིན་རྣམ་དག་མཆོག་གངས་ལྗོངས་སུ་ཕེབས་ཐེངས་གཉིས་པ་བསྐྱངས་སྐབས་ཁོང་ལ་གསང་ཆེན་མ་རྒྱུད་ཀྱི་དབང་བཞི་ཆ་ཚང་དང་། ཚེ་དབང་བོད་ཡུལ་མའི་དབང་བཞི་རྗེས་གནང་དང་བཅས་པ་བཀའ་དྲིན་བསྩལ་གནང་། ཤིང་ཕོ་ཁྱི་སྤྱི་ལོ་༡༩༩༤ཙམ་ནས་ལོ་འགའ་ཤས་བོན་གྱི་བརྟེན་འགྱུར་ཆེན་མོའི་དཔར་སྐྲུན་གྱི་ལས་ཀར་གྲུབ་དབང་སྤྲུལ་སྐུ་བསྟན་པའི་ཉི་མ་མཆོག་ལ་ཕྱག་རོགས་གནང་སྟེ་བོད་ལྗོངས་མི་དམངས་དཔེ་སྐུན་ཁང་དུ་བཞུགས། ཤིང་མོ་ཕག་སྤྱི་ལོ་༡༩༩༥ལོ་ཚུན་ནས་གཙང་སྨན་རི་དགོན་སོགས་ལ་དངོས་སུ་ཞབས་ཀྱིས་བཅགས་ཏེ་བསྟན་པ་མ་ཉམས་བརྒྱུད་འཛིན་ཡོང་ཆེད་གཟིགས་སྐྱོངས་ཀྱིས་མཛད་བཟང་རླབས་པོ་ཆེ་འཇོག་གནང་མཛད། མེ་མོ་གླང་སྤྱི་ལོ་༡༩༩༧ལོར་དགུང་ལོ་བཞི་བཅུ་ཞེ་གཉིས་ལ་ཕེབས་ཏེ་ལྷ་ལྡན་དུ་གཤེན་ཚང་བླ་བྲང་གསར་དུ་གཟིགས་ཏེ་ཡབ་སྲས་ཡུམ་སྐུ་འཁོར་དང་བཅས་ད་ལྟའི་བཞུགས་གནས་དེ་ཡིན་པས་དེ་ཡང་ལྷ་གདན་དུ་གཤེན་གྱི་བླ་བྲང་བྱུང་བ་ལོ་རྒྱུས་ཐོག་གི་དང་པོ་དེ་ཡིན་པར་སྣང་ངོ་། ས་མོ་ཡོས་སྤྱི་ལོ་༡༩༩༩ལོར་བོད་རང་སྐྱོང་ལྗོངས་ནང་བསྟན་མཐུན་ཚོགས་ཀྱི་ཚོགས་གཙོ་གཞོན་པའི་འགན་བཞེས་གནང་བ་དང་། ལོ་དེར་རྒྱལ་ཡོངས་ཆོས་ཚོགས་ཀྱི་ལས་འཛིན་མཛད། བོད་རབ་བྱུང་བཅུ་བདུན་པའི་ས་སྐྱོང་ཞེས་ཤིང་མོ་བྱ་སྤྱི་ལོ་༢༠༠༥ལོར་རི་རྒྱལ་དགོན་ཁྲི་བརྟན་ནོར་བུ་རྩེའི་འདུ་ཁང་ཆེན་མོའི་ས་འདུལ་རྨང་གཞི་གཏིང་གནང་སྟེ་ལོ་ཤས་ནང་ཕྱི་ནང་གི་རྟེན་བཞེངས་ཡོངས་རྫོགས་ལེགས་པར་གྲུབ། རབ་བྱུང་བཅུ་བདུན་པའི་འགལ་བ་ས་མོ་གླང་སྤྱི་ལོ་༢༠༠༩ལོར་དཔལ་ལྡན་དར་སྡིངས་གཤེན་གྱི་བླ་བྲང་གསར་བཞེངས་རྒྱ་ཆེར་གཏོང་གནང་བ་དང་། ལོ་དེར་རྒྱལ་ཡོངས་ཆོས་ཚོགས་ཀྱི་རྒྱུན་ལས་ལས་འཛིན་གནང་བ་དང་། འཛམ་གླིང་ཆོས་ཚོགས་ཀྱི་ཚོགས་འདུར་ཐེངས་གཉིས་ཕེབས།
མདོར་ན་ད་ལྟ་རབ་བྱུང་བཅུ་བདུན་པའི་ལྕགས་ཕོ་སྟག་གི་ལོ་དགུང་གྲངས་ལྔ་བཅུ་ང་ལྔར་ཕེབས་པའི་བར་སྔ་ཕྱིར་ནག་ཆུ་དང་དབུས་གཙང་སོགས་སུ་ཕེབས་ཐེངས་མང་པོ་ཞབས་ཀྱི་བཅགས་ཏེ་བོན་དགོན་ཁག་ལ་རྟེན་བཞེངས་དང་བཀའ་སློབ། གཟིགས་སྐྱོང་བླ་ན་མ་མཆིས་པ་བསྩལ་གནང་བ་མ་ཟད། ད་ལྟའི་ཆར་ཡང་དམ་པ་གང་ཉིད་ཞྭ་དཀར་སངས་རྒྱས་གཡུང་དྲུང་བསྟན་པའི་བདག་ཉིད་དང་། རྒྱལ་ཡོངས་ཆོས་ཚོགས་ཀྱི་རྒྱུན་ལས་ལས་འཛིན་བོད་བརྒྱུད་ནང་བསྟན་མཐུན་ཚོགས་ཀྱི་ཚོགས་གཙོ་སྐུ་གཞོན། དམུ་རིགས་གཤེན་གྱི་བསྟན་པ་གསས་ཁང་གསེར་སྒོ་ཁྲ་མོ་དང་རི་རྒྱལ་དགོན་ཁྲི་བརྟན་ནོར་གླིང་གི་དམངས་གཙོ་བདག་གཉེར་གྱི་དབུ་འཛིན་བཅས་གནང་མུས་ཡིན་ཞིང་། ཤེས་ཡོན་དང་བསམ་བློའི་གོ་རྟོགས་མཐོ་ལ། རྒྱལ་གཅེས་ཆོས་གཅེས་ཀྱི་ལངས་ཕྱོགས་བརྟན་ཞིང་། ཉིད་ཀྱིས་དུས་དང་རྣམ་པ་ཀུན་ཏུ་རིས་མེད་ཀྱི་ཉམ་ཐག་འགྲོ་ལ་སྙིང་རྗེས་ཐུགས་དགོངས་ཟབ་བཞེད་དང་། རྒྱལ་གཅེས་ཆོས་གཅེས་ཀྱི་བསམ་བློའི་བསླབ་བྱ་རྒྱུན་པར་དྲིལ་བསྒྲགས་དང་ལྷག་པར་ཆོས་ལུགས་གྲུབ་མཐའ་ཕན་ཚུན་དབར་གཅིག་ཕན་གཅིག་རོགས་ཀྱིས་མཛའ་བཤེས་དང་། མི་རིགས་མཐུན་སྒྲིལ་སློབ་གསོ་བཅས་ནམ་ཡང་མི་དོར་བ། མ་ཟད་དགེ་སྒྲུབ་སྡིག་སྤང་དང་ཡ་རབས་ཀྱི་སྤྱོད་བཟང་མི་དོར་བ་བཅས་བྱེད་དགོས་པའི་སྐོར་གྱི་ཞལ་ཏ་དད་ལྡན་མང་ཚོགས་ལ་གནང་བ་དང་། ལྷག་ཏུ་ཞྭ་དཀར་གཡུང་དྲུང་བོན་ལུགས་འཛིན་པ་ཡོངས་ཀྱི་སྐྱབས་མགོན་རྒྱལ་བ་གཤེན་གྱི་བསྟན་པའི་མངའ་བདག་གཅིག་པུ་དེ་ཡིན་ཞིང་། ད་ལྟ་གཤེན་གྱི་ཕོ་བྲང་ཉིད་དུ་བདག་ཅག་བསོད་ལྡན་ཡོངས་ཀྱི་མགོན་དུ་རྒྱལ་བསྟན་འཁོར་ལོ་གསུམ་གྱི་མཛད་བཟང་སྐྱོང་བཞིན་བཞུགས་པ་བཅས་ཀྱི་རྣམ་ཐར་མདོར་བསྡུས་སོ། །
ཟུར་བཀོད། གཤེ༵ན་སྲ༵ས་ཆེན་པོའི་གསེར་ཞལ་བཙོ་མའི་མདངས། །
རྨད་བྱུང་གསང་གསུམ་ནོ༵ར་བུ༵་རིན་པོ་ཆེ། །
དབ༵ང་མཆོག་རི་ནས་རྒྱ༵ལ་བསྟན་ཉེར་བཞེངས་པ། །
གང་གི་སྐུ་ཚེ་གེགས་མེད་རྟག་བརྟན་ཤོག །
གཤེན་སྲས་ནོར་བུ་དབང་རྒྱལ་མཆོག་དང་ཡུམ་དྭང་རའི་འགྲོ་འདྲེན་བཅུ་གསུམ་གྱི་ནང་ཚན་གྷུ་རུའི་གདུང་དང་རུས་གཅིག་ལས་འཁྲུངས་པའི་མཁའ་འགྲོའི་སྤྲུལ་པ་ཉི་མ་མཚོ་མོ་བྱ་བ་རིགས་རྒྱུད་ཤིན་ཏུ་བཟང་ལ་ངང་རྒྱུད་འཇམ་ཞིང་རིང་བ། བཞིན་འཛུམ་བག་ཡོད་ལྡན་ཞིང་ཉམས་ཐག་གི་འགྲོ་ལ་ཕན་སེམས་ཆེ་བ། དད་པ་དང་དག་སྣང་ཆེ་བ། བསྟན་པ་རིན་པོ་ཆེར་ལྷག་བསམ་དཀར་ལ་བྱམས་དང་སྙིང་རྗེ་ལྡན་ཞིང་ཅི་ཡོད་སྦྱིན་པ་ལ་དགའ་བ། ཁ་འདོན་བཟླས་བརྗོད་ལ་བརྩོན་པ་བཅས་མཛངས་ཡོན་ནི་བརྗོད་ལས་འདས་ཤིང་ཡེ་ཤེས་ཀྱི་མཁའ་འགྲོའི་མཚན་རྟགས་དང་ལྡན་པ་རྣམ་གཉིས་ལ་སྲས་སྐུ་མཆེད་ལྔ་བྱུང་ཡང་འཁྲུངས་པའི་དང་པོ་སྲས་པོ་སྟེ། ང་ཚོ་ཆེས་ཕངས་ཤིང་འགྱོད་པ་ནི་ཁོང་ཉིད་འདུལ་བྱ་གཞན་དུ་ཕེབས་པས་ངེད་ཅག་བསོད་ནམས་ཀྱི་སྐལ་བ་དམའ་སྟབས་སྐུ་གདུང་ནི་དཔལ་གཤེན་བསྟན་ཀླུ་ཕུག་གཡུང་དྲུང་བདེ་ཆེན་གླིང་དུ་གདུང་ཞུགས་ཕུལ་གནང་མཛད། དེ་འོག་བགྲེས་པ་གཉིས་སྲས་མོ་སྟེ། ཆེ་བ་བསོད་ནམས་ལྷ་སྐྱིད་དེ་འོག་གཅུང་མོ་བསོད་ནམས་གཡང་སྐྱིད་གཉིས་ཀྱི་འོག་མ་གདན་སའི་ཁྲི་འཛིན་སོ་དྲུག་པ་གཤེན་སྲས་གཙུག་ཕུད་རྣམ་གྲོལ་རྒྱལ་མཚན་མཆོག་དང་གཡུང་དྲུང་རང་གྲོལ་ཉི་མ་མཆོག་གཉིས་ཡིན།