གྲུབ་མཐའི་རྒྱལ་པོ་འཕྲུལ་ངག་གཡུང་དྲུང་བོན། །
གང་ལས་བྱུང་ཞིང་ཇི་ལྟར་དར་བའི་ཚུལ། །
ལེགས་བཤད་གཏམ་གྱི་མཛོད་ཁང་ཁ་བྱེ་བས། །
གཞུང་འདིས་བསྟན་པའི་རིང་ལུགས་བདེ་བླག་མཐོང་། །
སྡེ་གསུམ་རིམ་དགུའི་ཐེག་པ་ཇི་སྙེད་པ། །
གདུལ་བྱའི་སྣོད་དང་མཚམས་པར་བསྡུས་པའི་མཛོད། །
མདོ་སྔགས་ལམ་གྱི་རིམ་པ་ཀུན་གསལ་བ། །
འདི་ཡིས་བསྟན་པ་ཀུན་གྱི་ཉམས་ལེན་ཤེས། །
ཡོངས་རྫོགས་ཐེག་པའི་གྲུབ་མཐའ་མ་ལུས་པ། །
ལུང་དང་རིག་པའི་སྲང་ལ་ལེགས་གཞལ་ནས། །
ངོ་མཚར་མཛོད་ཆེན་གསར་དུ་བསྒྲུབས་པ་ཡིས། །
བློ་གསལ་ཡིད་ལ་མཁས་པའི་ངེས་ཤེས་སྦྱིན། །
ཁྱད་པར་བསྒྲགས་གསུམ་སྐོར་བཞི་མན་ངག་གི །
མཐར་ཐུག་དབྱིངས་རིག་རིན་པོ་ཆེ་ཡི་མཛོད། །
ཀུན་བཟང་དགོངས་པའི་ཀློང་ནས་རང་བརྡོལ་བས། །
སྙིགས་མའི་དུས་སུ་སངས་རྒྱས་མཛད་པ་བསྒྲུབས། །
ཡང་ཟབ་ཐུགས་ཀྱི་གསང་བ་ནམ་མཁའི་མཛོད། །
གདུལ་བྱའི་དོན་དུ་སྙིང་རྗེས་ལེགས་ཕྱེ་པའི། །
བྱིན་རླབས་དྲོད་རླང་མ་ཡལ་ཐུལ་ལེ་བས། །
སྐལ་ལྡན་རྣམས་ལ་གྲུབ་གཉིས་འདོད་དགུ་སྟེར། །
མཛོད་དང་འདུལ་བ་མདོ་སྔགས་ཀུན་འཛོམས་ཞིང་། །
མཛོད་ཆེན་འདི་རྣམས་བསྟན་པའི་སྙིང་པོ་ཡིན། །
མཛོད་ཁང་འདི་ལ་རིམ་དགུ་ཐེག་པ་འདུས། །
མཛོད་ལྔའི་འདི་འདྲ་སུས་ཀྱང་བསྡུས་པ་དཀའ། །
ཨ་ དཔལ་བཟང་གི་ཟིན་བྲིས་ལས་བཏུས།