མཚོ་སྔོན་ཕྱོགས་འདིར་གཡུང་དྲུང་བོན་གྱི་བསྟན་པ་ཐོག་མར་དར་ཚུལ་དང་བསྟན་པའི་གནས་གཞི་བྱུང་ཚུལ། དེ་ནས་ཉམས་གུད་སོང་ཚུལ། སླར་ཡང་གཏན་དུ་མ་ཉམས་པར་བསྐྱར་དར་བྱུང་ཚུལ་སོགས་ནི། སྔོན་དང་པོ་སྟོན་པ་གཤེན་རབ་ཀྱི་སྲས་གདུང་སོབ་མུ་ཆོ་ལྡེམ་དྲུག་གི་སློབ་མ་འཛམ་གླིང་མཁས་པ་རྒྱན་དྲུག་བྱོན་པའི་ནང་གི་ཁྲོམ་མཁས་པ་གསེར་ཐོག་ལྕེ་འབྱམས་ནི་མཚོ་སྔོན་ཕྱོགས་འདིར་འཁྲུངས་པ་ཡིན། དེ་ནས་བཟུང༌། རྨ་ཁྲོམ་ར་གསུམ་ཞེས། རྨ་རྒྱལ་ཆུ་གླིང་དང་ཁྲོམ་ཁྲི་གཤོག་རྒྱལ་མོའི་མཚོ་མོ། ར་རྒྱ་ཁྱུང་མགོན་སོགས་སུ་བོན་བསྟན་དར། དེ་ནས་བོད་རྒྱལ་དིང་ཁྲི་བཙན་པོའི་རིང་མདོ་ཁམས་གཡར་མོ་ཐང་ཞེས་པར་ཀ་ཅུའི(ཆུའི)མཁན་པོ་གཙུག་ཕུད་རྒྱལ་བ་འཁྲུངས་ནས། མཚོ་ཁའི་བོན་པོ་གདོང་སྣ་དང་འདུལ་བའི་བླ་རྣམ་དུ། བྲག་དཀར་རྩེ་མཐོར་སྒོམ་ལ་གནས། ཞེས་གསུངས་པ་བྲག་དཀར་སྤྲེལ་རྫོང་དང་ཁྲི་ཀའི་བོན་པོའི་གདོང་སྣ། སྲིན་པོ་རིའི་མེ་ལུང་བྲག་དཀར(རྨ་རི་དེའུ་གསུམ)གྱི་གྲུབ་གནས་སོགས་སུ་མདོ་སྔགས་གཉིས་ཀ་དར་བར་མཛད་པ་པོ་ནི། ཁྲོམ་གཤེན་རྔམ་པ་ལྕེ་རིང་དང་མཁན་ཆེན་མུ་ཟི་གསལ་བཟང་སོགས་ཡིན་པ་ཀུན་གྱིས་ཤེས་ལ། དེ་དག་གནམ་གྱི་ཁྲི་བདུན་རིང་ཡིན་པའང་ཤེས་ཐུབ་བོ། །དེའི་སྐབས་སུ་བོན་བསྟན་དར་བའི་རྟགས་མཚན་གསལ་བོ་ཅི་ཡོད་ཅེ་ན། ཨ་མདོའི་བྱམས་པ་འབུམ་གླིང༌། ཡ་ཟིའི་མཆོད་རྟེན་དཀར་པོ། ཁྲི་ཀའི་ལྷ་དཀར་པོ། རེབ་གོང་གི་དྲན་པའི་གྲུབ་གནས་སོགས་ཀྱིས་གསལ་བོར་ཤེས་ལ་བསྟན་པའི་བདག་པོ་ཁྲོམ་གཤེན་གྱི་དངོས་སློབ་ནི། ཁྲོམ་ཀརྨ་མུ་ཕྱོ་དང་མེ་ཉག་ནམ་ར་རྩེ་དགུ། སུམ་པའི་མཁས་པ་གྷུ་ཧུ་ལུ་སྤར་ཡའི་སློབ་མ་སུམ་པ་མུ་སྤུངས་གསལ་ཏིང༌། སུམ་པ་ལི་ཕྱོ་ཧ་ར། མེ་ཉག་ལྕེ་ཚ་མཁར་བུ། མཁས་པ་དྲུག་པོའི་ཞབས་བསྟེན་པའི་སློབ་མ་བླ་ཆེན་དྲན་པ་ནམ་མཁའ་སོགས་ཕྱོགས་འདིར་བྱོན་པ་བསྟན་འབྱུང་ལོ་རྒྱུས་རྣམས་ཞལ་མཐུན་ནོ། །
སྔ་འགྱུར་བསྟན་པའི་གནས་གཞི་བྱུང་ཚུལ་ནི། མཚོ་སྔོན་རེབ་གོང་ཕྱོགས་སུ་སློབ་དཔོན་དྲན་པ་ནམ་མཁས་བྱང་ཕྱོགས་གོང་མོའི་གུར་ཁང་དུ་གྲུབ་གནས་ཁྱད་པར་བ་ཞིག་ཡོད་ལ། རྒྱབ་ན་སྲིད་རྒྱལ་བླ་རི། མདུན་ན་བྲག་བཙན་ཟངས་རི། ཉེ་འདབས་སུ་ཨ་བ་ངོས་བཟང་གི་དགོན་སྡེ་བཏབ། སེ་བོན་གྱི་གདུང་རྒྱུད་ལས་མཆེད་པའི་ལྷ་སྡེ་སེ་བརྒྱ་བོན་ཐང་གི་སྡེ་ཡོད། ཤར་ཕྱོགས་ལྷ་རི་དཀར་པོའི་རྩ་བ་ན་དབལ་མོ་གནས་ཀྱི་དགོན་སྡེ་ཆེན་པོ་ཡོད། ཤར་ལྷོའི་སྟག་གཡག་བྱ་ལུང་རི་རྩེ་ན་སྤྱི་དགོན་གཡུང་དྲུང་གསང་བ་བདེ་ཆེན་གླིང་ཡོད། དེ་དང་ཉེ་བའི་དཀོན་མོའི་ཉིན་ཕྱོགས་ན་ཡེ་ཤེས་ཉི་མ་ཕུག་གི་དགོན་ཆེན་ཡོད། ཡར་ནང་ལྷོ་ཕྱོགས་གཡུ་འབྲོང་ཁྱུང་གསུམ་མདུན་དབུས་ན་ཞོ་ར་སྨན་གྱི་རི་བོའི་རི་ཁྲོད་ཡོད། ནུབ་ཕྱོགས་བྱ་ཁྱུང་ལྷུན་པོའི་མདུན་ལུང་ན་དགོན་ཁུག་བདེ་ཡངས་ཞེས་པའི་དགོན་སྡེ་ཡོད། བྱང་ཕྱོགས་རི་བོ་ཁྱུང་ཆེན་དར་མའི་ཁ་ལྡིང་ན་ཁྱུང་པོ་དར་ལྡིང་དགོན་ཆེན་ཞེས་པའི་སྒྲུབ་སྡེ་ཆགས། དེ་རྣམས་དུས་ཚོད་ནམ་ཞིག་རེད་ཅེ་ན། སྔོན་བོད་རྒྱལ་ཁྲི་སྲོང་ལྡེ་བཙན་གྱི་སྐུ་རིང་ལ་བོན་སྟོན་དྲན་པ་ནམ་མཁའ་ནས་ཨ་བ་ངོས་བཟང་དགོན་སྡེ་སོགས་ཕྱག་བཏབ་ནས་བསྟན་པ་དར་ཡོད་པའི་ཕྱིར། དེ་རྗེས་བོད་རྒྱལ་དར་མའི་རིང་ཁྲིམས་བཙན་པ་ལ་བྲོས་བཤོལ་ཚུལ་དུ་རེབ་གོང་གྲུབ་ཐོབ་གསུམ་ཞེས་ཡོངས་སུ་གྲགས་པ་སྤྱི་རྟིང་འཁོར་ལོས་བསྒྱུར་བ་དང༌། ངོ་མོ་ཡེ་ཤེས་མཚོ་རྒྱལ་དང་ཁྱུང་པོ་ཁྱུང་དཀར་ཚངས་པ་གསུམ། དབུས་ས་ཀ་གདོང་དྲུག་ནས་ཕྱོགས་འདིར་བྱོན་ཞེས་ལོ་རྒྱུས་དང་བཅའ་ཡིག་སོགས་ན་གསུངས་ཡོད་པ་དེ། ད་ལྟ་ཁྱུང་པོ་སྟེང་ཆེན་རྫོང་གི་རི་རྩེ་དྲུག་གི་ཕྱོགས་དེ་ནས་བྱོན་པ་ཡིན། གྲུབ་ཆེན་རྣམ་པ་གསུམ་གྱི་དྲན་པ་ནམ་མཁའི་བསྟན་པ་དར་ཡོད་པ་ལ་འཛིན་སྐྱོང་སྤེལ་གསུམ་མཛད་ནས་ངོ་སྤྱི་ཁྱུང་གསུམ་གྱི་སྒྲུབ་སྡེ་སོགས་དར་བ་ཡིན་ལ། མི་ལོ་སུམ་བརྒྱ་ཙམ་གྱི་ཡུན་ལ་ཧ་ཅང་བོན་བསྟན་དར་རྒྱས་བྱུང༌། དེ་ནས་རབ་བྱུང་བཞི་བའི་མགོ མི་ལོ་བརྒྱད་བརྒྱ་ཙམ་གྱི་སྔོན་དེར། སོག་རྒྱལ་ཆིང་གེ་སེ་བོད་དུ་ཐོན་ནས་བོད་ཁམས་དབང་དུ་སྡུད་པའི་ཐབས་སྣ་ཚོགས་བཀོལ། བཙན་དབང་གིས་དམག་ཤུགས་བཀོལ་ནས་བསྟན་པའི་གནས་གཞི་དགོན་སྡེ་མང་པོ་ཞིག་མེད་པར་བཏང་བ་དང་མགོ་མ་བཏགས་ནས་མི་མང་པོའི་ཚེ་སྲོག་ལ་གནོད་པ་ཚབས་ཆེན་བྱུང༌། བོད་ལ་གཅིག་གྱུར་གྱི་རྒྱལ་པོ་དང་མགོ་ཁྲིད་བྱེད་མཁན་མེད་པས་ཕམ་ཁ་བརྗོད་ལས་འདས་པ་ཞིག་བྱུང༌། དེ་རྗེས་གྲུབ་མཐའི་ཕྱོགས་ཞེན་དང་སྲིད་དབང་འཕྲོག་རྩོད་སོགས་དོན་རྐྱེན་ངན་པ་ཟུང་དུ་འབྲེལ་ནས་ཀརྨ་བཀའ་བརྒྱུད་དང༌། བོན་པོ། ཇོ་ནང་བཅས་ལ་ཉམས་གུད་ཆེན་པོ་བྱུང་བ་ཡིན་པ་ནི། ས་ཕག་འཁྲུགས་པ། ས་འབྲིའི་འཁྲུགས་པ། ཀར་དགེ་འཁྲུགས་པ་སོགས་མང་དུ་བྱུང་བའི་ལོ་རྒྱུས་དེས་ཤེས་སོ། །
དེ་ནས་རབ་བྱུང་ལྔ་བའི་ནང་ཁྱུང་དཀར་ཚངས་པའི་རྣམ་སྤྲུལ་ཁྱུང་པོ་གཡུ་ཐོག་འབར་བ་བྱོན་ནས། དྲན་པའི་གདན་ས་ངོས་བཟང་དགོན་པའི་ཚབ་ཏུ་ཁྱུང་དཀར་རིག་འཛིན་སྨིན་གྲོལ་གླིང་བཏབ། དེར་འབྲེལ་ཁྱུང་པོ་དར་ལྡིང་དགོན་པའི་ཚབས་སུ་ཁྱུང་དཀར་བསྟན་པ་རྒྱ་མཚོའི་གླིང་ཕྱག་བཏབ་པ་དང༌། ཧོར་ནག་གནམ་སྟེང་ཞྭ་དཀར་གཡུང་དྲུང་གླིང་དང་སྟོང་ཆེ་རིག་འཛིན་ཀུན་འདུས་རྣམ་རྒྱལ་གླིང༌། གླིང་བརྒྱ་ས་སོ་མ་རུ་མདོ་སྔགས་ཕུན་ཚོགས་དར་རྒྱས་གླིང༌། སྡོང་སྐམ་ན་གསང་སྔགས་བདུད་འདུལ་ལྷུན་གྲུབ་གླིང༌། དར་གྲོང་ན་སྒྲུབ་སྡེ་རྒྱལ་མཚན་མི་འགྱུར་གླིང༌། ཞོ་འོང་ཉིན་ཐ་ན་ཀུན་འདུས་གཡུང་དྲུང་འགྱུར་མེད་གླིང་སོགས་ཡོད། སྤྱི་རྟིང་འཁོར་ལོས་བསྒྱུར་རྒྱལ་གྱི་རྣམ་སྤྲུལ་སྐྱིད་སྟོན་འཁོར་ལོས་སྤྱི་དགོན་གཡུང་དྲུང་གསང་བ་བདེ་ཆེན་གླིང་གི་ཚབ་ཏུ་སྤྱི་ཨརྒ་སྟེང་ནས་ཐེག་ཆེན་བོན་འཁོར་ལྷུན་གྲུབ་གླིང་ཕྱག་བཏབ། དེར་འབྲེལ་སྤྱི་གད་པ་སྐྱ་བོ་ནས་གསང་སྔགས་རིག་འཛིན་དར་རྒྱས་གླིང་དང༌། སྤྱི་གདོང་མགོ་ནས་ཐེག་ཆེན་སྨིན་གྲོལ་རྒྱ་མཚོའི་གླིང༌། སྤྱི་དགོན་ཀུན་ཁྱབ་གཡུང་དྲུང་གླིང་སོགས་བྱུང་བ་རེད། ཡང་ངོ་མོ་ཡེ་ཤེས་མཚོ་རྒྱལ་གྱི་རྣམ་སྤྲུལ་ངོ་མོ་གྲུབ་ཆེན་ཡེ་ཤེས་ཁྲོ་རྒྱལ་བྱོན་ནས་དཀོན་མོ་ཉིན་གྱི་ཡེ་ཤེས་ཉི་མ་ཕུག་གི་དགོན་ཆེན་ཚབ་ཏུ་རྒྱལ་བསྟན་ཡེ་ཤེས་རྒྱ་མཚོའི་གླིང་ཕྱག་བཏབ། དེར་འབྲེལ། གྱང་རི་ན་རིག་འཛིན་ཐུགས་རྗེ་བྱང་ཆུབ་གླིང་སོགས་ཡོད།
ཡང༌། སྔོན་གྱི་གྲུབ་ཐོབ་རྣམ་གསུམ་གྱི་སློབ་མ་བོན་བརྒྱ་དབྱིངས་ཀློང་རིན་ཆེན་ཞེས་པས་བོན་བརྒྱ་གསང་སྔགས་རིན་ཆེན་དར་རྒྱས་གླིང༌། དེར་འབྲེལ། བོན་བརྒྱ་སྨན་རི་བཤད་སྒྲུབ་སྨིན་གྲོལ་གླིང༌། མག་སར་ན་ཁྱུང་པོ་བསྟན་པ་དར་རྒྱས་ཀྱིས་གཡུང་དྲུང་བསྟན་དར་གླིང་ཕྱག་བཏབ། གདུང་ངེས་ཉི་མ་འཛིན་གྱིས་གདུང་ངེས་གྲུབ་པ་ཀུན་འདུལ་གླིང་སོགས་བཏབ། དེ་ལ་ཡར་ནང་བོན་སྡེ་ཁ་གསུམ་ཞེས་སྤྱི་མིང་ཡོངས་སུ་གྲགས། དེ་ལས་མཆེད་དེ་ཕ་བོན་བརྒྱ་དབྱིངས་ཀློང་རིན་ཆེན་དང་མ་སོ་ནག་རྒྱལ་མོ་བྱམས་གཉིས་ཀྱི་སྲས་རྒྱུད་ལས་མང་དུ་མཆེད་དེ་རིགས་རྒྱུད་ཤིན་ཏུ་དར་བས། བོན་བརྒྱ་དུད་ཁྱིམ་བཅུ་འབྲོག་ཕྱོགས་སུ་སོང་བའི་རྒྱུད་ལ་ད་ལྟ་ཁྱིམ་གྲངས་སྟོང་ཕྲག་ལྷག་ཡོད། སྲས་རྒྱུད་མ་ཞང་ཕྱོགས་སུ་འཕེལ་བ་ལ་ད་ལྟ་སོ་ནག་བོན་པོ་ཚང་ཞེས་ཁྱིམ་གྲངས་ཉིས་བརྒྱ་ཙམ་ཡོད། དེའི་ནང་དུ་སོ་ནག་བོན་པོ་སྤྱི་འདུལ་གར་གྱི་དབང་ཕྱུག་ཅེས་ཡོངས་གྲགས་སོ་ནག་བོན་ཕྲུག་གྲུབ་ཆེན་ཐོག་འཛིན་བྱོན་ནས་དེའི་གདུང་རྒྱུད་དང་སློབ་བརྒྱུད་ལ། མདོ་སྔགས་བསྟན་རྒྱས་གླིང་ཞེས་བཙུན་དགོན་དང་སྔགས་དགོན་ཟུང་འབྲེལ་དུ་དར་བ་འདི་བྱུང༌། ཐུན་ཏེ་ར་རྒྱའི་ཕྱོགས་སུ་བོན་བསྟན་སླར་གསོ་བྱས་པ་ནི་སེ་བཟའ་མི་འཇིགས་ཀུན་བཟང་དཔལ་ལྡན་གླིང་སོགས་བྱུང༌། དེ་དག་ཐམས་ཅད་ལ་བོན་བརྒྱ་ལྷ་རྗེ་དཔའ་མཁར་དང་རང་ཤར་རིག་གྲོལ། གཡུང་དྲུང་ཕུན་ཚོགས། སྐུ་སྐྱེས་ཆེ་བ་དང་གྲུབ་དབང་ནམ་མཁའ་རྒྱལ་མཚན་སོགས་བླ་རབས་རིམ་བྱོན། རྩེ་ཞིག་བླ་རབས། སྟོང་ཆེ་བླ་རབས་རྣམས་ཀྱིས་བསྐྱངས་ནས་ད་ལྟའི་བར་དུ་མ་ཉམས་པར་གནས་པ་འདི་རྣམས་སོ། །
ཡང༌། རླངས་རྒྱལ་བོ་ངོ་མོའི་གདུང་རྒྱུད་ལས་རེབ་གོང་མར་ནང་དུ་མཆེད་པ་ནི། མར་ནང་བོན་ཚང་མ(འདི་པཎ་ཆེན་སྐུ་ཕྲེང་བཅུ་བའི་རུས་དཔོན་ཡིན)དང་དབལ་ལུང་དང་ལྷོ་བ་སོགས་ཡིན་ལ། སྐྱིད་སྟོན་འཁོར་ལོའི་གདུང་རྒྱུད་ལས་མཆེད་པ་ནི་གུང་ཧོ་སྐ་གསར་བོན་པོའི་ནང་ན་ཨེར་ཏིའི་སྐྱིད་ཚང་དང་མཁའ་ཡངས་གདུང་གི་རྒྱུད་གཉིས་ཀ་ཡོད་ལ་དེར་སྟོན་ཁྱུང་ཞབས་དྲུང་རིན་པོ་ཆེས་ཕྱག་བཏབ་པའི་ཨེར་ཏིའི་དུང་དཀར་དགོན་པ་སོགས་ཡིན། ཡང་བྱང་ཕྱོགས་བོན་པོ་གོས་སྔོན་ཅན་ཞེས་གྲུབ་ཐོབ་ཀུན་ཏུ་བཟང་པོའི་གདུང་རྒྱུད་དང་སློབ་བརྒྱུད་ལས་དཔའ་ལུང་དོན་ཤེས་དང་ཤར་སྟེང༌། གཟུངས་སྤྱོད་རྒྱུད། འབའ་འོག གཟུངས་ཐོག་སོགས་ཀྱི་བོན་སྡེ་དང་དེ་དག་ལ་སྟོན་ཁྱུང་ཞབས་དྲུང་རིན་པོ་ཆེས་བདག་གིར་མཛད་ནས་དར་རྒྱས་བྱུང་བ་ཡིན། ཁྱད་པར་སྔོན་ཆད་བྱ་ཁྱུང་བོན་སྐྱོང་དགོན་པ་ཞེས་ཕྱོགས་འདིར་ཆེས་སྔ་བའི་དགོན་སྡེ་ཞིག་ཡོད་པ་དེ། ཆོས་རྗེ་དོན་གྲུབ་རིན་ཆེན་རིང་ནས་གནས་སྤོར་དགོས་པ་བྱུང༌། བ་ཡན་རྩ་བ་ཕྱོགས་སུ་གནས་སྤོས་པ་ལ་སྟོན་ཁྱུང་དགོན་པ་ཟེར། རབ་བྱུང་ལྔ་བའི་ནང་ཡིན། དེ་རྗེས་ཧེ་དམག་ལ་རྒྱུ་ནོར་བརྫངས་ནས་མེད་པར་བཏང་ན་ཡང་སྟོན་ཁྱུང་ཞབས་དྲུང་བསོད་ནམས་གཡུང་དྲུང་དབང་རྒྱལ་ནས་ད་ལྟའི་དགོན་གནས་སྐྱ་ཡེ་གནས་མགོའི་ཕུ་ལ་ཕྱག་བཏབ་ནས་བསྐྱངས། ཁྱུང་རྒྱལ་བོན་བརྒྱ་སྐེད་དང་སྐྱ་ཡེ་གནས་མགོ ཇོས་རྒྱ། ཨ་ཀ་ར་སོགས་ལྷ་སྡེ་ཡིན། ཁྱུང་དཀར་རྒྱུད་འཛིན་སྡོང་སྐམ་ནས་ཆད་པའི་སྣང་རའི་ཞྭ་ཁྲ་ཡང་བོན་གྱི་སྒྲུབ་སྡེ་ཞིག་ཏུ་གྱུར་ནས་ད་ལྟའི་བར་དུ་གནས་ཡོད་ལ་སྲིད་པ་རྒྱལ་མོའི་རྡོ་སྐུ་རང་བྱོན་ཡང་བཞུགས་ཡོད།
ཁྲི་ཀའི་ཕྱོགས་སུའང་རབ་བྱུང་བཞི་བའི་ནང་བྲུ་སྟོན་མཐའ་བྲལ་བསོད་ནམས་རྒྱལ་མཚན་གྱི་དངོས་སློབ་སོག་བཙུན་སྟོན་པ་ཡེ་ཤེས་རྒྱལ་མཚན་དང༌། སོག་སྡེ་པདྨ་རྒྱལ་ཞེས་སྐུ་མཆེད་རྣམ་པ་གཉིས་ཁྲི་ཀའི་ཡུལ་དུ་བྱོན་ནས། མེ་ལུང་བྲག་དཀར་དང་ལྷ་དཀར་པོ། བོན་པོའི་གདོང་སྣ་རྣམས་ཀྱི་ཚབ་ཏུ་སྟོང་ཆེ་ཁྱུང་མོང་གྲྭ་ཚང་དང་འཕྲང་དམར་ལུང་བའི་ཨ་དགོན་སྒྲུབ་སྡེ་ཉམས་པའི་རྗེས་སུ་སེ་བརྒྱ། རྨེའུ་ཚང་གོང་བ་སོགས་སྒྲུབ་སྡེ་དར་རྒྱས་བྱུང་བ་ཡིན་ནོ། །མཚོ་སྔོན་ཁྲི་གཤོག་རྒྱལ་མོའི་ཉེ་འགྲམ་གྱི་མཚོ་ཁའི་བོན་པོའི་གདོང་སྣ་དང་ལྷ་མོ་སྲིད་རྒྱལ་དྲེའུ་ནག་མོའི་དགོན་པ(ད་ལྟ་ལྷ་མོ་དྲེའུ་ཟེར་བ་དེ་ཡིན)དང༌། སད་དོ་དགོན་པ་ཞེས་པ་ཞང་སྐད་སད་དོ་ཞེས་པ་ལྷ་ཡིན་པས། ལྷ་དགོན་ཞེས་པ་དེ(ད་ལྟ་སད་དོ་དགོན་པ་ཟེར་བ་སྔགས་རྙིང་མ་བའི་དགོན་སྡེ་དེ་ཡིན)རྣམས་ནི་བོན་པོས་སླར་གསོ་བྱེད་མ་ཐུབ། དེར་མ་ཟད་བྲག་དཀར་སྤྲེལ་རྫོང་ཞེས་མ་རྒྱུད་ཀྱི་སྒྲུབ་གནས་བསྐོར་བ་གཡོན་བསྐོར་བྱེད་དགོས་པ་དེ་ཡང་བོན་པོས་བསྐྱར་གསོ་བྱེད་མ་ཐུབ་བོ། །
གོང་དུ་བཤད་པའི་སྒྲུབ་སྡེ་དེ་དག་ད་ལྟའི་བར་དུ་མ་ཉམས་པར་གནས་ནའང་སྔོན་ཆད་ཆོས་ལུགས་ཀྱི་ཁྱད་དབང་ངན་པ་ཛ་དྲག་ཡིན་པས་དགོན་སྡེ་ཞེས་མིང་བཏགས་མ་ཆོག གནས་གཞི་འཛུགས་བསྐྲུན་ཡང་ཕྲག་དོག་དབང་གིས་རྒྱས་སྤྲོས་བྱས་མ་ཆོག་ན་ཡང་། ད་ལྟ་གུང་ཁྲན་ཏང་དང་མི་དམངས་སྲིད་གཞུང་གི་བཀའ་དྲིན་ལ་བརྟེན་ནས་ཡར་རྒྱས་འབྱུང་བཞིན་པ་འདིའོ། །