རྒྱལ་བསྟན་རིན་ཆེན་དྲི་མེད་མདོ་སྔགས་སྙིང་བོའི་ཉེ་ལམ་མཆོག །
ཚུལ་བཞིན་ལྷུར་འབྲས་ཡང་དག་དོན་གྱི་རིག་པ་རང་ཤར་ཏེ། །
ལུང་རིག་བཀྲ་ཤིས་རེ་ཁས་མཛེས་པའི་བཀའ་འབུམ་རྒྱལ་མཚན་ཆེ། །
སྲིད་ཞིའི་བླ་རུ་འཇིགས་པ་མེད་པ་འདེགས་མཁས་དབང་བོའི་དྲུང་། །
རྣམ་དག་ངེས་འབྱུང་མྱུ་གུ་སད་ལ་ཤོར། །གཞན་ཕན་ཀ་ཅ་རང་གཅེས་འཇབ་བུས་འཕྲོག །
རྨད་བྱུང་དག་སྣང་ནོར་བུ་འདམ་དུ་བྱིངས། །མདོ་ཤོར་སྟོང་ཟོབ་མཁན་དེས་གུས་ཞུ་བ། །
ཕ་མཐའ་མི་མངོན་མཛད་བཟང་མ་དྲོས་ཕང་བ་ལས། །ལེགས་འཁྲུངས་ཕུལ་བྱུང་གང་མཚན་ས་འཛིན་ལྷུན་པོའི་སྤོར། །
བསྔགས་འོས་ཡོན་ཏན་བྱེ་བའི་མན་དྷའི་ལྗོན་ཆེན་བརྟས། །གངས་ལྡན་གླིང་བཞིའི་དབུས་ན་འཚོ་ཞིང་བཞེས་པ་རྨད། །
རྨོངས་པའི་ཁྲོད་ན་ཚུལ་འཆོས་ང་རོ་མཐོ། །ཚུལ་མིན་གོམས་ཆེས་དམ་པའི་ཁྱུ་ནས་བུད། །
སོ་སྐྱེས་ཕལ་བ་ལས་ཀྱང་སྐལ་དམན་བདག །སེམས་པ་མགོན་ཁྱེད་དྲུང་ཕྱོགས་བདེ་བར་བདོག །
མཚམས་ཞུ།
ཐུགས་སྐྱོ་ངེས་འབྱུང་ཚད་མ་ཡང་དག་གིས། །འདི་སྣང་ཕུན་ཚོགས་མཆིལ་མའི་ཐལ་བ་བཞིན། །
བོར་ནས་དབེན་པར་བསླབ་གསུམ་མཐར་སོན་པ། །རྗེ་བཙུན་དམ་པ་སླར་ཡང་གར་དུ་རྩེན། །
ལྔ་ཕྲག་ཟུང་གི་ལུང་རིགས་པི་ཝང་སྒྲ། །རྣམ་དཔྱོད་སོར་མོས་སྙན་འཇེབས་གླུར་བཀུགས་ཏེ། །
གཟུར་གནས་མཁས་མང་དྲི་ཟའི་ཡིད་གསོས་སུ། །འཐེན་མཁས་སྨྲ་བའི་སེངྒེ་གཉིས་སུ་སྣང་། །
དགོངས་བརྡ་སྙན་བརྒྱུད་མན་ངག་ཙི་ཏྟའི་ཁྲག །ཌཱཀྐིའི་རྒྱ་ཅན་ཐུན་མོང་མ་ཡིན་པ། །
ཆེར་སྙིགས་འགྲོ་བའི་དཔྱིད་དུ་ཕོངས་མེད་དུ། །སྦྱིན་པ་གཏེར་སྟོན་བརྒྱ་རྩའི་རྒྱལ་ཚབས་དངོས། །
རིགས་ནས་རྨོངས་ཆེན་མནལ་ལས་མ་སད་པའི། །མ་གྱུར་སྐྱེ་རྒུ་དུཿཁས་མནར་བ་དག །
ཕྱམ་གཅིག་ངེས་ལེགས་སྦྱོར་བའི་ཁུར་བསྣམས་པ། །རྒྱལ་སྲས་སྙིང་རྗེ་ཆེན་པོའི་དཔེར་ཟླར་འཁུ། །
ཟད་དང་མི་སྐྱེ་ཤེས་པའི་ཡང་དག་དོན། །རྩོལ་བྲལ་རྒྱལ་ས་ཟིན་པའི་དགོངས་པ་ཆེ། །
ཐོག་མའི་མགོན་པོ་གུད་ན་མེད་པའི་སར། །ཕེབས་པའི་ཉམས་རྟོགས་བླ་མེད་རྩེ་རུ་ཆིབས། །
ཁྱད་པར་གོང་མའི་ལུང་རིགས་ཟླ་ཉིས་སྨིན་པར་མ་ནུས་པའི། །
ངེས་གསང་མཐར་ཐུག་ཐོད་རྒལ་སྦས་དོན་བ་ཀུ་ལ་ཡི་ཁ། །
འཕུར་འགྲོའི་ལུང་དང་དབུ་མའི་རྩ་མདུད་རང་གྲོལ་འགྲམ་ཆང་གིས། །
ཕྱེས་ཏེ་ལས་ལྡན་གདུལ་བྱའི་ཚོགས་ལ་དགའ་སྟོན་འགྱེད་འདི་མཚར། །
དེ་བཞིན་བསྔགས་འོས་ཡོན་ཏན་ཀུན་ཁེབས་ཕ་མཐའ་ཆེ། །
ཚུལ་མཐོང་བྱིས་བློ་འུར་བའི་གཤོག་པས་གཞལ་དཀའ་ཡང་། །
ཆ་ཙམ་ཚིག་ཏུ་འགྲེམ་པའི་གེ་ས་ར་ཡི་ཚལ། །གཡོ་ཟོག་མིན་པར་དད་པའི་མགོ་ལྕོག་ལག་སྟོང་ལྡེམ། །
ཆེད་དོན་ལྔ་བདོའི་མཚན་མ་མངོན་སུམ་ལྷགས། །རྒྱལ་བསྟན་འོད་སྣང་ནུབ་རིར་ཆས་དགོངས་ལ། །
ཚེ་དང་ཡེ་ཤེས་མཐའ་ཡས་ངོ་བོ་རུ། །མི་ཤིགས་གཡུང་དྲུང་ཁྲི་ལ་ཏིཥྛནྟུཿ །
རིས་བྲལ་རྒྱལ་བསྟན་སྤྱི་དང་ཁྱད་པར་དུ། །ཅོདྤན་དུང་འོད་འགྱུར་བའི་རིང་ལུགས་འདིའི། །
བཤད་སྒྲུབ་སྲིད་པའི་ཁམས་ལས་བརྒལ་བ་དང་། །འབྲེལ་ཚད་སྨིན་གྲོལ་མཐར་སོན་ཐུགས་བརྣག་འཚལ། །
ཕྲན་བུ་རང་ཡང་དེང་ནས་བྱང་ཆུབ་བར། །ཐུགས་རྗེའི་གཏེར་ཆེན་ཁྱེད་ཀྱིས་ཉེར་དགོངས་ལ། །
འདི་ཕྱི་བར་དོར་རིགས་ཀྱི་བདག་པོ་རུ། །བཞུགས་ཏེ་འབྲལ་མེད་རྗེས་འཛིན་སྐྱབས་འཇུག་ཀྱཻ། །
དེ་ལྟའི་ཞུ་ཆུང་འདེགས་རྟེན་རིན་ཆེན་གཉིས་པ་རྡེལ་ཚད་དང་། །
ན་བཟའི་དོད་ཙམ་ཟ་འོག་གསེར་མདངས་ཁ་དྲུག་འཇའ་ལྷམ་སག །
བསྐལ་བརྒྱར་གཞེས་པའི་རྟེན་འབྲེལ་ཁྲི་གདན་རྒྱབ་ཡོལ་ལྷ་རྫས་བཅས། །
ཟླ་ཚེས་དགེ་བར་ས་མཐའི་ཁྲོད་ནས་སྒོ་གསུམ་གུས་པས་ཕུལ། །