འགྱུར་མེད་ལྷན་སྐྱེས་བདེ་བ་ཆེན་པོ་ལས། །དག་པ་རབ་འབྱམས་བརྟན་གཡོའི་སྒྱུ་འཕྲུལ་གར། །
སྟོན་མཛད་ཁྱབ་བདག་འོད་དཀར་གནས་འཛིན་དང་། །དབྱེར་མེད་དཔལ་ལྡན་བླ་མའི་ཞབས་པདྨོར། །
གཞན་དཀའི་བཀའ་དྲིན་དྲན་པའི་དྲི་གཞོན་གྱིས། །བསྐྱོད་པས་བདག་ལུས་འཁྲི་ཤིང་ལན་མང་དུ། །
ཕྱག་གི་གར་དུ་གཡོ་བའི་རོལ་སྒེག་དང་། །ལྷན་ཅིག་བསྟོད་བསྔགས་མེ་ཏོག་སིལ་མར་འཐོར། །
ཇི་སྲིད་མཁའ་དང་སེམས་ཅན་གནས་པ་དེ་སྲིད་ཕྱོགས་བཅུའི་འཇིག་རྟེན་དུ། །
བཅུ་གཉིས་མཛད་པས་མཐའ་ཀླས་འགྲོ་ལ་བདུད་རྩིའི་དགའ་སྟོན་མཆོག་སྦྱིན་པ། །
དུས་གསུམ་ཕྱོགས་བཅུའི་གཉིས་མེད་གསུངས་པ་དེ་སྲས་སློབ་མར་བཅས་རྣམས་ཀྱང་། །
གང་གི་སྤྲུལ་བའི་ཟློས་གར་ཉིད་ལས་གཞན་དུ་མེད་པར་ངེས་རྙེད་པས། །
ཁྱེད་ནི་སྲིད་གསུམ་འགྲོ་བའི་བླ་མ་སྟེ། །ཁྱེད་ནི་སྡུག་བསྔལ་བརྒྱ་ཕྲག་སྐྱོབ་པའི་མགོན། །
ཁྱེད་ནི་སྐྱེ་རྒུའི་མ་འདྲིས་མཛའ་བའི་བཤེས། །ཁྱེད་འབའ་ཞིག་ནི་གཏན་གྱི་སྐྱབས་སུ་འཛིན། །
དེ་ཕྱིར་མི་འཇིགས་གདོང་ལྔས་བཏེགས་པའི་ཁྲིར། །བསྟན་འགྲོའི་མགོན་དུ་འཚོ་ཞིང་གཞེས་ངོས་ནས། །
རླབས་ཆེན་ཕྲིན་ལས་ཉིན་བྱེད་འབར་བའི་འོད། །ནམ་མཁའི་དཀྱིལ་འཁོར་མཐའ་དང་མཉམ་བདལ་བས། །
སྲས་བཅས་རྒྱལ་བའི་དགྱེས་ཞལ་པདྨོའི་འཛུམ། །རབ་བཞད་སྐྱེ་རྒུ་ཡོངས་ལ་འཕྲལ་ཡུན་དུ། །
དགེ་བའི་སྣང་བ་ཟད་མ་ཤེས་པ་རུ། །སྤྲོ་བར་དད་པས་ཐལ་མོ་ལན་བརྒྱར་སྦྱོར། །
འདི་ན་བླང་དོར་དཔྱོད་པའི་བློ་མིག་ལྡོང་། །དམ་པའི་མགོན་གྱི་དམིགས་བུ་དང་བྲལ་བཞིན། །
སྡེ་དགོན་ཕྱོགས་རེས་ཚེར་མའི་ཐང་འཁྱམས་པའི། །སློབ་མའི་ཐ་ཤལ་སྤྲུལ་མིང་འཛིན་བདག་ལ། །
བརྩེ་བའི་བཀའ་མཆིད་པདྨ་དཀར་པོའི་ཕྲེང་། །སྐྱེས་བཟང་གསེར་གྱི་ཀཻ་ས་རས་མཛེས་པ། །
བདེ་ཆེན་འཁོར་ལོའི་རྒྱན་དུ་སྩལ་བ་གང་། །ཡིད་རབ་དད་དང་སྤྲོ་བའི་གསོས་སུ་གྱུར། །
ཆགས་སྡང་རྨོངས་པའི་གདོན་གྱིས་ཆེར་གཡོས་པས། །སྒོ་གསུམ་ཉེས་སྤྱོད་གོམ་འགྲོས་འཁྱོར་བ་ཡིས། །
འཇིགས་རུང་ངན་འགྲོའི་གཡང་སར་ལྟུང་ཉེ་བའི། །བདག་སོགས་འགྲོ་ལ་བརྩེ་བས་རྗེས་དགོངས་ཏེ། །
ཞིང་འདིའི་མགོན་དུ་འགྲོ་བའི་སྒྲོན་མ་ཉིད། །རྒྱ་མཚོའི་རྡུལ་རྙེད་ལས་འདས་བསྐལ་བ་རུ། །
གཞོམ་མེད་གཡུང་དྲུང་གསུམ་གྱི་རང་བཞིན་དུ། །བརྟན་པར་བཞུགས་པའི་གསོལ་བ་སྙིང་ནས་འདེབས། །
ཕུན་ཚོགས་པད་ཚལ་འབུམ་དུ་བཞད་བྱེད་རྒྱལ་གཤེན་བསྟན་པ་སྣང་བའི་མཛོད། །
སྙིགས་མའི་ལོག་སྤྱོད་སྤྲིན་ནག་སྟུག་པོས་ཆེས་ཆེར་ཉིད་དུ་བསྒྲིབ་པ་གང་། །
ཁྱེད་ཀྱི་ཐུགས་རྗེ་འཐོར་རླུང་དྲག་པོས་མྱུར་བ་ཉིད་དུ་བསལ་བྱས་ཏེ། །
བཤད་དང་སྒྲུབ་པའི་འོད་ཀྱི་སྣང་བས་ཕྱོགས་མཐར་ཁྱབ་པའི་བཀའ་དྲིན་སྩོལ། །
ཕྲན་ཆུང་བདག་ཀྱང་ཚེ་ཡི་ལྷག་མ་ཅི་ཙམ་ལུས་པ་དེ་སྲིད་དུ། །
དབེན་པར་བྱང་ཆུབ་གཞུང་ལམ་དྲང་བོར་ཚུལ་བཞིན་སྒྲུབ་པའི་གོམ་སྟབས་གང་། །
བསྐྱོད་པས་ངེས་ལེགས་གྲོང་ཁྱེར་ཆེན་པོར་བདེ་བླག་འཇུག་པའི་ཉེར་བསྡོག་ལ། །
ཕྱི་ནང་གསལ་བའི་གེགས་བྱེད་མཐའ་དག་ཡོངས་སུ་ཞི་བའི་སྐྱབས་འཇུག་མཁྱེན། །
ཚེ་འདིའི་སྣང་བ་ཡོངས་སུ་འགག་ནས་བཟུང་། །བྱང་ཆུབ་བར་གྱི་ཚེ་རབས་ཐམས་ཅད་དུ། །
གང་གི་ཐུགས་རྗེའི་ལྕགས་ཀྱུས་ཉེར་བཟུང་སྟེ། །དོན་གཉིད་ལྷུན་གྱིས་འགྲུབ་པར་མཛད་དུ་གསོལ། །