སྐྱབས་མཆོག་དམ་པ་མཉམ་མེད་འགྲོ་བའི་མགོན། །མཁས་གྲུབ་དུ་མའི་གཙུག་རྒྱན་རིན་པོ་ཆེ། །
ཐོས་བསམ་བསྒོམ་བསྒྲུབས་ཉན་བཤད་སྲོལ་ཆེན་བཙུགས། །བསྟན་པའི་མངའ་བདག་མཁས་གྲུབ་སྤྱན་གཅིག་པ། །
རྗེ་བཙུན་བླ་མའི་ཞབས་ལ་གསོལ་བ་འདེབས། །ཤེས་བྱ་ཀུན་གསལ་མཁས་མཆོག་ཕུལ་དུ་ཕྱིན། །
རབ་འབྱམས་གནས་ལྔ་རིག་པའི་པཎྚི་ཏ། །རྒྱལ་བའི་རྒྱལ་ཚབ་མཁས་གྲུབ་རིན་པོ་ཆེ། །
མཚན་ལྡན་འགྲོ་བའི་མགོན་པོ་སྤྱན་གཅིག་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །
ཡོངས་འཛིན་མཁས་མང་རྒྱ་མཚོའི་ཐུགས་བཅུད་བླངས། །འཆད་རྩོད་རྩོམ་གསུམ་རིག་པའི་ཚ་ཟེར་གྱིས། །
སྡེ་སྣོད་གསུམ་ལ་བློ་གྲོས་སྤོབས་པ་ཐོབ། །ལུང་རིགས་དབང་ཕྱུག་མཁས་གྲུབ་སྤྱན་གཅིག་པ། །
རྗེ་བཙུན་བླ་མའི་ཞབསལ་གསོལ་འདེབས། །འདུལ་ཁྲིམས་བསླབ་བྱའི་མངའ་བདག་དྲང་སྲོང་རྒྱལ། །
ཟབ་ལམ་སྔགས་ཀྱི་བདག་ཉིད་གསང་འདུས་གཤེན། །གནས་ལུགས་རྫོགས་ཆེན་དོན་རྟོགས་ཀུན་ཏུ་བཟང་། །
རྒྱུད་གསུམ་མངའ་བདག་མཁས་གྲུབ་སྤྱན་གཅིག་པ། །རྗེ་བཙུན་བླ་མའི་ཞབས་ལ་གསོལ་བ་འདེབས། །
འདྲེན་པ་ཆེན་པོ་མཚུངས་མེད་བཀའ་དྲིན་ཅན། །རབ་འབྱམས་མཆོད་སྤྲིན་ནམ་མཁའ་གང་བས་མཆོད། །
དུག་ལྔའི་དབང་གྱུར་མི་དགེའི་ལས་རྣམས་བཤགས། །བདག་སོགས་འགྲོ་ཀུན་ཐུགས་རྗེས་རྒྱུན་བཟུང་ནས། །
བསླབ་གསུམ་བསྟན་པའི་སྲོག་ཤིང་འཛུག་པར་ཤོག །
ཅེས་ལྔ་བརྒྱའི་འདྲེན་མཆོག་མཉམ་མེད་སེམས་དཔའ་ཆེན་པོས་ས་གསུམ་འགྲན་ཟླ་དང་བྲལ་བའི་རྗེ་བཙུན་སྨན་རི་བ་ལ་མཆོད་པར་བརྗོད་པའི་ཚུལ་འདི་ནི། ཉིད་ཀྱི་བཀའ་དྲིན་རྗེས་སུ་དྲན་པ་ལ་བརྟེན་ནས། སློབ་འབངས་མངའ་རིས་བསོད་ནམས་རྒྱལ་མཚན་གྱིས་ཕུལ་བ་དགེ་ལེགས་འཕེལ། དགེའོ། །