ཨེ་མ་ཧོ། ཕྱོགས་བཅུའི་རྒྱལ་བ་ཡི་དམ་མཁའ་འགྲོ་ཡི། །ཐུགས་རྗེ་བྱིན་རླབས་གཅིག་ཏུ་བསྡུས་པ་ཡི། །འཛམ་བུ་གླིང་དུ་འགྲོ་བའི་དོན་བྱོན་པ། །འགྲོ་དོན་རྒྱུན་ཆད་མེད་པའི་ཐུགས་རྗེ་ཅན། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་ཚེ་ལོ་བརྒྱ་བའི་དུས། །ཚེ་མཐར་མི་ཕྱིན་བར་ཆད་མང་བའི་དུས། །ཁྱེད་ནི་རིག་འཛིན་ཚེ་ལྷའི་འཁོར་གྱིས་བསྐོར། །ཚེ་ཡི་བར་ཆད་ཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་ས་བཅུད་ཉམས་པའི་དུས། །འབྲུ་བཅུད་མི་འཕེལ་བཙའ་སད་མང་བའི་དུས། །ཁྱེད་ནི་འབྲུ་ཡི་གཏེར་བདག་ཚོགས་ཀྱིས་བསྐོར། །འབྲུ་བཅུད་དངོས་གྲུབ་སྩོལ་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་བསོད་ནམས་མར་འགྲིབ་སྐབས། །དབུལ་འཕོངས་ཕྱྭ་གཡང་ཟས་བཅུད་ཉམས་པའི་དུས། །ཁྱེད་ནི་འཛམ་བྷ་ལྷ་ཡི་འཁོར་གྱིས་བསྐོར། །རྒྱུ་ནོར་གཏེར་མཛོད་སྩོལ་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་དཀར་ཕྱོགས་འཁྱམས་པའི་དུས། །ནག་ཕྱོགས་གཞི་བདག་ས་བཟུང་བྱེད་པའི་དུས། །ཁྱེད་ནི་གཞི་བདག་ཟོ་དོར་འཁོར་གྱིས་བསྐོར། །དཀར་ཕྱོགས་རང་གནས་འཁོར་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་ཆར་ཆུ་མི་འབེབ་དུས། །ལྷ་ཀླུ་གཞི་བདག་ཚོགས་རྣམས་ཉམས་པའི་དུས། །ཁྱེད་ནི་ལྷ་ཀླུ་ཆར་བདག་འཁོར་གྱིས་བསྐོར། །ཆར་ཆུ་དུས་སུ་ཕོབ་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་འཁྲུགས་རྩོད་བྱེད་པའི་དུས། །སེམས་ཅན་མང་བོ་གྲི་ལ་ཤི་བའི་དུས། །ཁྱེད་ནི་ཡི་དམ་ཁྲོ་བོ་ཁྲོ་མོས་བསྐོར། །དུས་འཁྲུགས་དམག་དཔུང་ཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་སྒོ་ནོར་འཆི་བའི་དུས། །ཉ་གོར་གློ་ཧོན་ནད་རིགས་དར་བའི་དུས། །ཁྱེད་ནི་མཁའ་འགྲོ་ནོར་ལྷའི་ཚོགས་ཀྱིས་བསྐོར། །ནོར་ནད་མྱུར་དུ་བཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་ནད་རིམས་འོང་བའི་དུས། །ཚ་གྲང་གོ་ལྡོག་སྨན་སྦྱོར་མི་ཕན་དུས། །ཁྱེད་ནི་སངས་རྒྱས་སྨན་ལྷའི་འཁོར་གྱིས་བསྐོར། །ནད་རིམས་མཐའ་ལ་བཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་བསམ་པ་མི་འགྲུབ་དུས། །ལམ་ལོག་ཁ་ལོ་འདྲེ་ཡིས་བསྒྱུར་བའི་དུས། །ཁྱེད་ནི་ལྷ་སྲུང་བོན་སྐྱོང་ཚོགས་ཀྱིས་བསྐོར། །བསམ་དོན་ལམ་འགྲོ་མཛད་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་དགེ་སྦྱོར་མི་འགྲུབ་དུས། །དགེ་བྱེད་ཚུལ་ཁྲིམས་བར་ཆད་མང་བའི་དུས། །ཁྱེད་ནི་རྩ་བའི་བླ་མ་འཁོར་གྱིས་བསྐོར། །དགེ་བ་མཐའ་རུ་ཕྱིན་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་གཟའ་སྐར་འཁྲུགས་པའི་དུས། །ནམ་མཁའ་མེ་འོད་སྤྲིན་ཚོགས་ཤར་བའི་དུས། །ཁྱེད་ནི་དུས་བཞི་ལྷ་ཡི་འཁོར་གྱིས་བསྐོར། །གནམ་ཐན་ལྟས་ངན་བཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་བར་སྣང་སྟོང་སྒྲ་གྲགས། །ས་གཞི་འགུལ་ནས་སྐྲག་བསྔངས་འོང་བའི་དུས། །ཁྱེད་ནི་ས་གནོན་ཁྲོ་བོའི་འཁོར་གྱིས་བསྐོར། །ས་གཞི་གཡོ་འགུལ་བཟློག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་འདྲེ་བགེགས་དར་བའི་དུས། །ཤི་འདྲེ་གསོན་འདྲེས་གནོད་པར་བྱེད་པའི་དུས། །ཁྱེད་ནི་ཡི་དམ་དྲག་པོ་འཁོར་གྱིས་བསྐོར། །འདྲེ་གདོན་དམ་ལ་ཐོག་ཅིག་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ད་ལྟ་དུས་ངན་མ་རུང་ལྟས་ཚོགས་དང་། །མེ་དགྲ་ཆུ་དགྲ་རླུང་དགྲའི་དགྲ་ཚོགས་དང་། །ས་དགྲ་འབྱུང་བ་དུས་ཀྱི་དགྲ་རྣམས་ཀྱང་། །ཁྱེད་ཀྱི་ཐུགས་རྗེས་རང་སར་ཞི་བར་ཤོག །བདག་ནི་ནམ་ཞིག་འཆི་བའི་དུས་བབས་ལ། །ཁྱེད་ནི་སངས་རྒྱས་བདེར་གཤེགས་འཁོར་གྱིས་བསྐོར། །བར་དོའི་འཇིགས་སྐྲག་ཁྱེད་ཀྱིས་བསྐྱབ་ཏུ་གསོལ། །བདེ་ཆེན་ལམ་སྣ་ཁྲིད་མཛད་ཡབ་སྲས་གསུམ། །དྲན་པ་བདུད་འདུལ་སྐུ་ལ་གསོལ་བ་འདེབས། །ཁྱེད་ཀྱི་ཐུགས་རྗེ་ཉེ་རིང་མེད་པ་ལ། །ནང་ནུབ་དུས་དྲུག་ཁྱེད་ཀྱི་ཐུགས་རྗེ་གཟིགས། །གཟུགས་ཅན་གཟུགས་མེད་དགྲ་ཚོགས་ཁྱེད་ཀྱིས་བཟློག །འདི་དང་ཕྱི་མའི་སྐྱབས་མགོན་མ་ཆུང་ཞིག །བསམ་པའི་དོན་ཀུན་འགྲུབ་པར་བྱིན་གྱིས་རློབས། །ཨཱོྃ་ཨཿཧཱུྃ། དྲན་པ་མུ་ལ་ཧ་རི་ནི་ས་སི་ཏི་འདུས་འདུས། །