བོད་རྒྱལ་ཐོག་མ་གཉའ་ཁྲི་བཙན་པོའི་སྐབས་སུ་གཤེན་ནམ་མཁའ་སྣང་བ་མདོག་ཅན་དབུའི་མཆོད་གནས་ཀྱི་བླ་མར་བཀུར་ཞིང་། གཉའ་ཁྲིའི་སྲས་མུ་ཁྲི་བཙད་པོ་ནི་རྒྱལ་པོ་ཡང་ཡིན་ལ་བླ་མ་ཡང་ཡིན་ཏེ། མུ་ཁྲི་ཡན་ལ་གོང་མ་ཆེ་དྲུག་ཅེས་སྤྱི་སྤུངས་བླ་མ་བརྒྱུད་པའི་གཙོ་བོར་བྱེད། དེ་ནས་ཧ་ར་ཅི་པར་རམ་ཡེ་ཤེས་བླ་མ་སོགས་གདུང་བརྒྱུད་བཅུ་གསུམ། མཁས་པ་མི་བཞི། ལོ་པཎ་གཤེན་བརྒྱད། བོན་ཆེན་བཞི་བཅུ། དྲན་པ་ཡབ་སྲས་སོགས་ཞང་བོད་ཀྱི་པཎ་གྲུབ་དགུ་བཅུ་རིམ་པར་བྱོན་པ་ནི། གཉའ་ཁྲི་ནས་ཁྲི་སྲོང་གི་བར་དུ་རྒྱལ་པོའི་ཆབ་སྲིད་དང་། བོན་གྱི་བསྟན་པ་གཉིས་མཉམ་དུ་བྱུང་བ་ལ། རྒྱལ་གཤེན་བསྟན་པ་མཉམ་དར་ཞེས་སུ་གྲགས།
དེ་ཡང་བོད་ཀྱི་རྒྱལ་པོ་རེ་རེ་ལ། སྐུ་བསྲུང་བའི་གཤེན་ཆེན་རེ་རེ། དབང་ལུང་ཁྲིད་མན་ངག་བཅས་པ་གནང་བའི་དབུ་བླ་རེ་རེ་ཡོད་པ་ནི། བསྟན་འབྱུང་རྣམས་ལས་ཤེས་ལ་འདིར་མ་བྲིས། དེ་ལས་ཀྱང་གནམ་གྱི་ཁྲི་བདུན་གྱིས་བོན་རིན་པོ་ཆེ་སྤྱི་སྤུངས་སྐོར་གསུམ་ཉམས་སུ་བླངས་ནས། ཡི་དམ་ལྷ་དང་དབྱེར་མེད་དུ་གྱུར་ཏེ། གདོས་བཅོས་ཀྱི་ཕུང་པོ་ལྷག་མེད་དུ་སངས་རྒྱས་པ་ཡོད་ལ། ཁྲི་བདུན་ལ་བང་སོ་མེད་པར་གནམ་དུ་བཏབ་ཅེས་པའི་ཐ་སྙད་ཆགས། གྲི་གུམ་གྱིས་བོན་བསྟན་བསྣུབས་ནས་བོན་ལོག་པ་དར་བར་བྱས་ཀྱང་ཡུན་མ་རིང་། ལོ་བཅུ་གསུམ་ནས་སྤུ་དེ་གུང་རྒྱལ་གྱི་སྲིད་བཟུང་ནས་གདུང་རྒྱུད་བཅུ་གསུམ་གྱི་བསྟན་པ་དར་བར་མཛད། བོད་རྒྱལ་ཉེར་བརྒྱད་པ་ཐོ་ཐོ་རི་ཡང་། གསང་སྔགས་འཆང་བ་ཡིན་པར་མ་ཟད། རྫོགས་ཆེན་པའང་ཡིན་པས་བོན་ཆེན་གཉན་བཙན་ཞེས་མཚན་ཐོགས། སྲོང་བཙན་སྒམ་པོ་ཡང་རྫོགས་ཆེན་རྣལ་འབྱོར་བ་ཡིན་པ་གསུངས་མགུར་གྱིས་ཤེས། ཁྲི་སྲོང་གི་སྐུ་ཚེ་སྨད་ལ་བོན་བསྟན་ནུབ་པ་ཡང་བོད་རང་དུ་ཡོད་པའི་ཆོས་བོན་ལ་དད་མཁན་དང་། རྒྱ་གར་ནས་ཡོང་བའི་ཆོས་ལ་དད་མཁན་བར་རྩོད་པ་ཤོར་ནས་རྒྱལ་བློན་འབངས་གསུམ་མི་བདེ་བར་གྱུར། གླང་དར་གྱིས་རྩོད་པ་དེ་མེད་པར་གཏོང་ཆེད་ཆོས་ལུགས་གཉིས་ཀ་མེད་པར་བཏང་། ཆབ་སྲིད་ཁོ་ནས་སྐྱོང་བར་འདོད་ཀྱང་ལྷ་ལུང་དཔལ་རྡོས་བསད། མཐར་བོན་ཆོས་གཉིས་སླར་དར་བ་ལ་བསྟན་པ་ཕྱི་དར་གྱི་ཐ་སྙད་བཏགས། དེ་ཡན་ཆད་བསྟན་པ་སྔ་དར་གྱི་བླ་མ་རྣམས་སོ།།
འདུལ་བརྒྱུད་བླ་མའི་གཅོ་བོ་ཡང་སྔ་དར་སྐབས་རྟག་གཟིགས་དམུ་ཚ་ཏྲ་ཧེ་ནས་རིམ་བཞིན་ཞང་ཞུང་རྫུ་འཕྲུལ་ཡེ་ཤེས་སོགས་དང་། ག་ཅུ་གཙུགས་ཕུད་རྒྱལ་བའི་སློབ་མ་ཡ་གོང་ཡེ་ཤེ་རྒྱལ་བ་དང་། ཕམ་ཤི་དཔལ་གྱི་དབང་ཕྱུག་གཉིས་ནི། བོད་ཀྱི་བཙུན་པ་འདུལ་འཛིན་ཐོག་མ་རྣམ་གཉིས་ཡིན། དེ་ནས་སྡེ་བཙུན་རབ་གསལ། ཡེ་ཤེས་ཚུལ་ཁྲིམས། མུ་ཟི་གསལ་བཟང་སོགས་བྱོན། མུ་ཟི་ནི་མི་ལོ་སྟོང་དང་བརྒྱད་བརྒྱར་འགོག་པར་བཞུགས། ད་ལྟ་བོད་ཡུལ་དུ་འདུལ་བ་མ་ཉམས་པ་དེའི་བཀའ་དྲིན་ཡིན། དེ་ནས་སོག་སྟོན་ཁྲི་འབར་ཚུལ་ཁྲིམས་སོགས་དང་། བླ་ཆེན་དགོངས་པ་རབ་གསལ་སོགས་མཁན་བརྒྱུད་རིམ་པར་བྱོན་པ་རྣམས་འདུལ་བར་བརྒྱུད་པའི་བླ་མའི་གཙོ་བོར་བྱེད་དེ་འདུལ་བརྒྱུད་ཞལ་ཐང་ལྟར་རོ།།
ཕྱི་དར་སྐབས་མདོ་སྔགས་ཟུང་འབྲེལ་དུ་དར་བར་མཛད་པའི་བླ་མ་གྲགས་ཆེ་བ་འགའ་ཙམ་གྱི་མཚན་བརྗོད་ན། རབ་བྱུང་མ་ཚུགས་གོང་དུ། རྗེ་བཙུན་བྱང་བ་ཁྲོ་ཚང་འབྲུག་ལྷ་གཤེན་སྟོན་ཀླུ་ཡི་དབང་པོ། བྲུ་ཆེན་ནམ་མཁའ་གཡུང་དྲུང་། རྒྱལ་སྲས་ཞུ་ཡས་ལེགས་པོ། སྤ་སྟོན་དཔལ་མཆོག་རྒྱལ་བ། རྨེའུ་ལྷ་རི་གཉན་པོ། གཏེར་སྟོན་ཁུ་ཚ་ཟླ་འོད་སོགས་བྱོན།།
（རབ་བྱུང་དང་པོའི་ནང་）རྗེ་བཙུན་དམ་པ་དགོངས་མཛོད་རི་ཁྲོད་པ། བྲུ་ཤ་རྗེ་བཙུན་དམ་པ། རྨེའུ་མཁས་པ་དཔལ་ཆེན། ཡར་མེ་བ་ཤེས་རབ་འོད་ཟེར། གཉེན་འཐིང་ཤེས་རབ་རྡོ་རྗེ། བླ་མ་སྨན་གོང་བ་སོགས་བྱོན། （རབ་བྱུང་གཉིས་པར་）བཞེད་སྟོན་དངོས་གྲུབ་གྲགས་པ། ལུང་བོན་ལྷ་གཉན། གྱེར་མི་ཉི་མ་འོད་ཟེར། རྨ་སྟོན་སྲོལ་འཛིན། ཞུ་ཆེན་ཡེ་ཤེས་རིན་ཆེན། གཡོར་བོ་མེ་དབལ། སུམ་སྟོན་ལྷ་འབུམ། གུ་རུ་རྣོན་རྩེ་སོགས་བྱོན། （རབ་བྱུང་གསུམ་པར་）རྗེ་དམ་པ་རང་གྲོལ། དཔོན་གསས་ཁྱུང་རྒོད་རྩལ། འགྲོ་མགོན་བློ་གྲོས་རྒྱལ་མཚན་སོགས་བྱོན། （རབ་བྱུང་བཞི་པར）བྲུ་འདུལ་བ་རྒྱལ་མཚན། རྒྱལ་བ་གཡུང་དྲུང་། གཅུང་ནམ་མཁའ་འོད་ཟེར། བོན་ཞིག་གཡུང་དྲུང་གླིང་པ་སོགས་བྱོན། （རབ་བྱུང་ལྔ་པར་）མཐའ་བྲལ་བསོད་ནམས་རྒྱལ་མཚན། བསོད་ནམས་བློ་གྲོས། སོག་བཙུན་ཡེ་ཤེས་རྒྱལ་མཚན། མཚུངས་མེད་བསོད་ནམས་བློ་གྲོས། གཅུང་ནམ་མཁའ་བསོད་ནམས། རྟོགས་ལྡན་རི་བ་འབྲུག་གསས། ཁོད་པོ་བློ་གྲོས་ཐོགས་མེད་སོགས་བྱོན། （རབ་བྱུང་དྲུག་པར）རྗེ་མཉམ་མེད་ཤེས་རབ་རྒྱལ་མཚན། རྒྱལ་ཚབ་རིན་ཆེན་རྒྱལ་མཚན། སྤྲུལ་སྐུ་བློ་ལྡན་སྙིང་པོ། གཤེན་ཉི་མ་རྒྱལ་མཚན། ཁྲོ་གཉན་རྒྱལ་མཚན་སོགས་བྱོན། （རབ་བྱུང་བདུན་པའི་ནང་།）རྒྱལ་བ་མཉམ་མེད་ཆེན་པོས་གཙང་ཐོབ་རྒྱལ་དཔལ་ལྡན་སྨན་རིའི་དགོན་སྡེ་བཏབ། དེ་ནས་བཟུང་སྨན་རིའི་མཁན་རབས་རིམ་པར་བྱོན་པ་རྣམས་ནི། སྨན་རི་དང་གཡུང་དྲུང་གླིང་གི་དགོན་སྡེ་མཆོག་གི་གདན་རབས་ལྟར་རོ། སྐྱང་འཕགས། དོ་འཕགས། གཙོ་འཕགས་ཞེས་འཕགས་པ་རྣམ་གསུམ་དང་། ཞིག་ཆེན་བཅོ་བརྒྱད་སོགས་དང་། བྲུ་ཞུ་སྤ་རྨེའུ་གཤེན་ཚང་ཁྱུང་པོ་སོགས་གྲྭ་ས་ཆེན་པོ་རྣམས་ཀྱི་བླ་མ། སྤ་བཟང་པོ་བཅུ་གསུམ། སྤ་ཉི་མ་འབུམ་གསལ། སྤ་བསྟན་པ་འབྲུག་གྲགས། ཁྱུང་སྤྲུལ་འཇིག་མེད་ནམ་མཁའ། ཁྱུང་པོ་སྨོན་ལམ་རིན་ཆེན། བཟོད་པ་རིན་ཆེན། སྣང་གསལ་རིན་ཆེན་སོགས་མང་དུ་བྱོན། མདོ་སྨད་དུ། སྐྱང་སྤྲུལ་ནམ་མཁའ་རྒྱལ་མཚན། ཡོན་ཏན་རྒྱལ་མཚན། དོ་འཕགས་ཆེན་པོ། ཉི་མ་འཛིན། ཀུན་དགའ་རྒྱལ་མཚན། གྲུབ་ཐོབ་བསྟན་པ་དར་རྒྱས། བློ་གྲོས་ཐོགས་མེད། ཀུན་དགའ་ཕུན་ཚོགས། རྟོགས་ལྡན་གཡུང་དྲུང་ཚུལ་ཁྲིམས། སྐྱབས་མཆོག་བསོད་ནམས་ཕུན་ཚོགས། སྣང་ཞིག་ནམ་མཁའ་བློ་གྲོས། སྣང་ཞིག་བསྟན་པའི་ཉི་མ། རྒྱ་འོབ་བསྟན་པ་རབ་རྒྱས། རྩེ་ཞིག་སྟོང་ཉིད་བྱ་འཕྲུར།དྲུང་རམས་པ་ཤེས་རབ་རྣམ་རྒྱལ། ཆོས་རྗེ་རྒྱལ་བ་ཚུལ་ཁྲིམས། བོན་བརྒྱ་རང་ཤར་རིག་གྲོལ། སྦ་སར་ནམ་མཁའ་དབང་ཕྱུག ཤར་རྫ་བཀྲ་ཤིས་རྒྱལ་མཚན། གཏེར་ཆེན་གསང་སྔགས་གླིང་པ། ཚུལ་ཆེན་བསྟན་པའི་རྒྱལ་མཚན། དཔྲ་སྟོན་སྐལ་བཟང་རྒྱལ་མཚན། བོན་བརྒྱ་གཡུང་དྲུང་ཕུན་ཚོགས། གྲུབ་དབང་ནམ་མཁའ་རྒྱལ་མཚན།། སྐྱོང་སྤྲུལ་ལུང་རྟོགས་རྒྱ་མཚོ། རྩེ་ཞིག་ཡུང་དྲུང་དབང་རྒྱལ་སོགས་རིམ་པར་བྱོན་པ་ནི་ཚོགས་ཞིང་དང་བླ་མ་ཀུན་འདུས་ཀྱི་ཞལ་ཐང་ལྟར་རོ།།།།