མཁན་སློབ་ཉི་ཟླ་ཟུང་འབྲེལ་དང་རིས་མེད་སློབ་མ་དག་ལྷན་འཛོམས་ཀྱི་འདྲ་པར།
ད་རེས་ཀྱི་མཛད་སྒོ་འདི་ནི་མཁན་རིན་པོ་ཆེ་བསྟན་པ་གཡུང་དྲུང་དབུས་པས་Franceགཤེན་བསྟན་དར་རྒྱས་གླིང་གི་འདུས་ཚོགས་ནས་ཇི་ལྟར་གསོལ་སྨོན་བཏབས་པ་བཞིན་༧སྐྱབས་རྗེ་རྒྱལ་བ་སྨན་རི་བ་སོ་གསུམ་པ་ཆེན་པོ་སྟོན་འཁོར་དང་། བཀུར་འོས་གཡུང་དྲུང་རྒྱལ་མཚན་བཅས་ཕྱི་ཚེས་༢༠ཉིན་རྒྱ་གར་གྱི་རྒྱལ་ས་ལྡི་ལིའི་གནམ་ཐང་བརྒྱུད་Franceལ་ཕེབས་ཐོན་གནང་། Franceརྒྱལ་སའི་གནམ་ཐང་དུ་ཕེབས་གྲུབ་མ་ཐག་མཁན་རིན་པོ་ཆེ་བསྟན་པ་གཡུང་དྲུང་དང་གཤེན་བསྟན་དར་རྒྱས་གླིང་གི་ལས་སྣེ་བ་གཙོས་འབྲེལ་ཡོད་ཕྱི་རྒྱལ་གྱི་བོན་འབངས་རྣམས་ཀྱིས་ཕེབས་བསུ་དང་མཇལ་ལམ་ཞུས། ཕྱི་ཚེས་༢༡ཉིན་བདག་ཅག་རྣམས་ཀྱི་འདྲེན་པ་ཆེན་པོ་སྐྱབས་རྗེ་རྒྱལ་བ་སྨན་རི་བའི་མཁན་སློབ་ཉི་ཟླ་ཟུང་ཞིག་སླར་ཡང་ནུབ་ཕྱོགས་ཀྱི་གླིང་ཁ་སྟེ་གཤེན་བསྟན་དར་རྒྱས་གླིང་འདིར་དགྱེས་ཞལ་མཉམ་འཛོམས་ཀྱི་ལེའུ་གསར་པ་ཞིག་དབུ་ཚུགས་ཏེ་སེར་ཕྲེང་གིས་བསུ་མ་དང་བཅས་༧སྐྱབས་རྗེ་རྒྱལ་བ་སྨན་རི་བ་ཆེན་པོ་མཆོག་གི་ཞབས་ཟུང་འཁོར་ལོའི་རེ་ཁ་གཤེན་བསྟན་དར་རྒྱས་གླིང་དུ་བདེ་བར་འཁོད།
སྐྱབས་རྗེ་རྒྱལ་བ་སྨན་རི་བའི་ཁྲི་འཛིན་རིན་པོ་ཆེ་དང་ཡོངས་འཛིན་རིན་པོ་ཆེ་རྣམ་གཉིས།
ཕྱི་ཚེས་༢༢ཉིན་སྐྱབས་རྗེ་རྒྱལ་བ་སྨན་རི་ཆེན་པོ་མཆོག་གིས་གཤེན་བསྟན་དར་རྒྱས་གླིང་གི་ཕྱི་ནང་ཁོར་ཡུག་ཀུན་ལ་རབ་གནས་དང་འཚམས་གཟིགས་གནང་། ཕྱི་ཚེས་༢༥ཉིན་མཁན་སློབ་ཉི་ཟླ་ཟུང་དང་མཁན་རིན་པོ་ཆེ་ལུང་རྟོགས་བསྟན་པ་གཡུང་དྲུང་གཙོས་བླ་མ་དགེ་བཤེས་རྣམས་ཀྱིས་མངའ་དབུལ་རབ་གནས་ཀྱི་ཆོ་ག་ཞལ་ཕྱེས་ཏེ་ཕྱི་ཡི་མཆོད་རྟེན་དང་། མཚམས་ཁང་། ནང་གི་སྐུ་གསུང་ཐུགས་རྟེན་བཅས་ལ་བྱིན་གྱིས་བརླབས་པ་དང་། གཡུང་དྲུང་བཀོད་ལེགས་མཆོད་རྟེན་གྱི་མདུན་དུ་ཀུན་གསལ་སྒྲོན་མེའི་ཞལ་ཁ་ཕྱེས་ཏེ་སྐྱ་སེར་འདུས་པ་ཀུན་གྱིས་མར་མེ་སྨོན་ལམ་འུར་འདོན་གནང་ཤིང་ཞབས་སྐོར་དུ་ཐེངས་གསུམ་ཕེབས་གྲུབ་མཚམས་ཇ་སྟོན་དང་བཅས་རབ་ཏུ་གནས་པའི་མཛད་འཕྲིན་གྱི་མཇུག་གྲུབ།
སྐྱབས་རྗེ་རྒྱལ་བ་སྨན་རི་བའི་༧ཁྲི་འཛིན་རིན་པོ་ཆེ་དང་། ཡོངས་འཛིན་རིན་པོ་ཆེ། མཁན་པོ་བསྟན་པ་གཡུང་དྲུང་རིན་པོ་ཆེ་རྣམ་གསུམ།
ཕྱི་ཚེས་༢༧གྱི་ཞོག་ཀར་བསང་གསོལ་གྱི་མཆོད་སྤྲིན་དང་སྦྲགས་དར་ཚོན་སྣ་ལྔ་ལས་གྲུབ་པའི་དར་པོ་ཆེ་བཙུགས་པ་དང་། རླུང་རྟ་སྒྲོན་ཏེ་གཡུང་དྲུང་བོན་གྱི་བསྟན་པ་ཡུན་རིང་དུ་གནས་ཞིང་སྐྱེ་འགྲོ་སེམས་ཅན་གྱི་བདེ་རྩ་ཡིད་བཞིན་འགྲུབ་པའི་ཐུགས་སྨོན་གནང་བ་དང་ཀི་བསྭོ་ལྷ་རྒྱལ་འཐེན། ཕྱི་ཚེས་༢༦ནས་༢༨བར་༧སྐྱབས་རྗེ་མཁན་སློབ་རྣམ་པ་གཉིས་ནས་རིམ་བཞིན་སྔ་དྲོ་དང་ཕྱི་དྲོའི་དུས་ཚོད་ལ་བོན་འཆད་ཁྲིད་ཀྱི་བཀའ་དྲིན་སྐྱབས་འཇུག་བསྐྱངས་ཏེ་འཛམ་གླིང་ས་ཕྱོགས་གང་ས་ནས་ཕེབས་པའི་དད་ལྡན་པ་སུམ་བརྒྱ་ལྷག་ཙམ་ཞིག་ལ་ཐུགས་ཕན་སོས་པའི་ཕན་བདེའི་ལེགས་ཚོགས་ཆད་མེད་དུ་བསྩལ་བས་ཐམས་ཅད་དགའ་མགུ་ཡིད་རང་དང་སྦྲགས་སྤྲོ་སེམས་འཁོར་བའི་སེམས་ཀྱི་བདེ་སྐྱིད་རང་རྒྱུད་ལ་ཐོབ་པ་དེ་ནི་བླ་མས་བྱིན་གྱིས་བརླབས་པའི་དོན་ངོ་མ་ཞིག་ཀྱང་ཡིན་པ་རེད།
ཕྱི་ཚེས་༢༩ཉིན་༧སྐྱབས་རྗེ་སྨན་རིའི་ཁྲི་འཛིན་རིན་པོ་ཆེ་མཆོག་གིས་སྐྱ་སེར་འདུས་པ་ཀུན་ལ་ཀུན་གསལ་བྱམས་མ་ཆེན་མོའི་བཀའ་དབང་བཀའ་དྲིན་སྐྱབས་འཇུག་བསྐྱངས་མཚམས་མཛད་སྒོའི་མཇུག་བསྡུ་ལེགས་གྲུབ་བྱུང་བ་ཡིན་པ་རེད། ད་རེས་ཀྱི་མཛད་སྒོ་འདི་ནི་༧སྐྱབས་རྗེ་རྒྱལ་བ་སྨན་རི་བའི་མཁན་སློབ་རྣམ་པ་གཉིས་ནུབ་ཕྱོགས་ཀྱི་གླིང་ཁ་འདི་རུ་མཉམ་འཛོམས་ཀྱི་གོ་སྐབས་ཆེས་དཀོན་ལ་རིན་ཐང་ཆེ་བའི་ནང་གི་ལེའུ་ཚན་ཐོག་མ་ཞིག་དང་། ཕྱི་ཕྱོགས་བོན་གྱི་སློབ་འབངས་རྣམས་ཀྱང་བོན་འཆད་ཁྲིད་དང་བཀའ་དབང་ཟབ་མོ་འདི་ལྟ་བུའི་སྐྱབས་འོག་དུ་ཚུད་དཀའ་བ་ཞིག་ཡིན་པ་བཅས་དང་། རང་ཅག་བོན་འབངས་རྣམས་ལ་ལྟོས་ན་འདི་ལས་ལྷག་པའི་སྐལ་བཟང་གི་གོ་སྐབས་ཤིག་ཐོབ་པར་དཀོན་པ་ཡིན་པ་བཅས་ཀྱི་གནས་ཚུལ་མདོར་བསྡུས་སུ་སྤེལ་བའོ། །།