ད་ལྟ་ཁྱེད་ཀྱི་གནས་ཡུལ་ནི། - ཧི་མ་ལ་ཡའི་བོན། >> ཆ་འཕྲིན། >> འབྲེལ་ཡོད་བོད་ཀྱི་གནའ་རྫས་རྙེད་སོན།
འབྲེལ་ཡོད་བོད་ཀྱི་གནའ་རྫས་རྙེད་སོན།
[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། བསྟན་པ་རིན།] [ཟླ་ཚེས། 11-03-04] [ཀློག་གྲངས། ]

 2011-02-28 སྔར་བོད་ཀྱི་ཆ་ཤས་མངའ་ཁུལ་གློ་ཡུལ་གྱི་ཐག་རིང་རི་ཁུག་ཏུ་གནའ་བོའི་བྲག་ཕུག་རྙིང་པ་མང་པོ་ཞིག་ཡོད་པ་བརྙེད་ཐུབ་པ་བྱུང་འདུག
༄༅༎རི་བོ་ཇོ་མོ་གླང་མའི་རྩེ་མོར་ཐེངས་བདུན་འཛེགས་སྐྱོད་གནང་མཁན་ཨ་རི་བ་པི་ཊར་ཨེ་ཐེན་སི་ཡིས་༢༠༠༤ནས་བཟུང་བལ་ཡུལ་བྱང་ཕྱོགས་ཁུལ་མིག་གི་སྐྱ་སྒྲིབ་གཤག་བཅོས་ཀྱི་དགེ་རྩའི་ལས་དོན་ནང་མཉམ་ཞུགས་གནང་བའི་རྗེས་། ཉེ་དུས་ཁོང་གིས་སྔར་བོད་ཀྱི་ཆ་ཤས་མངའ་ཁུལ་གློ་ཡུལ་(Mustang)གྱི་ཐག་རིང་རི་ཁུག་ཏུ་གནའ་བོའི་བྲག་ཕུག་རྙིང་པ་མང་པོ་ཞིག་ཡོད་པ་བརྙེད་ཐུབ་པ་བྱུང་སྟེ། བྲག་ཕུག་དེ་ཚོའི་ནང་ནས་སྔར་གྱི་བོན་པོའི་རྩ་ཆེའི་ཕྱག་དཔེའི་གཏེར་མཛོད་ཆེན་པོ་གཉིས་དང༌། ཡང་སྟོན་པ་ཡེ་ཤུ་མ་འཁྲུངས་གོང་གི་ལོ་བརྒྱའི་སྔོན་གྱི་མིའི་རུས་པ་བརྙེད་སོན་བྱུང་གནང་བཞག། ཨ་རི་བ་པི་ཊར་ཨེ་ཐན་སི་ཡིས་༡༩༩༦ལོར་རི་བོ་ཇོ་མོ་གླང་མའི་རྩེ་མོར་འཛེགས་སྐྱོད་བྱེད་མཁན་མི་གྲངས་༡༥རྐྱེན་ལམ་དུ་ཕྱིན་པའི་གནས་ཚུལ་བྱུང་སྐབས་ཁོང་གིས་རི་འཛེགས་པ་དེ་ཚོ་སྐྱོབ་ཐབས་ཀྱི་འབད་བརྩོན་ཆེན་པོ་གནང་ཡོད་སྟབས་། ཁོང་ལ་འཛམ་གླིང་ནང་Mr. Everestཞེས་ཡོང་གྲགས་མིང་ཐོབ་ཡོད་པ་རེད། བལ་ཡུལ་ནང་མིག་གི་སྐྱ་སྒྲིབ་གཤག་བཅོས་སྐབས་རོགས་པ་གནང་བའི་དུས་རིང་ ཁོང་གིས་ས་གནས་ཡུལ་མི་མང་པོ་དང་གྲོགས་པོ་ཆགས་གནང་ཡོད་པ་དང༌། དེ་ཚོའི་གྲས་ནས་མི་འགའ་ཤས་ཀྱིས་ཁོང་རི་མཐོ་སར་སུས་ཀྱང་འགྲོ་མྱོང་མེད་སའི་གནའ་བོའི་བྲག་ཕུག་ཡོད་སར་སྣེ་འཁྲིད་བྱས་པའི་རྗེས་སུ། པི་ཊར་ཨེ་ཐེན་སི་ལ་ཡ་མཚན་ཅན་གྱི་བྲག་ཕུག་དེ་ཚོའི་ཐོག་ཞིབ་འཇུག་གནང་རྒྱུའི་འདོད་པ་ཆེན་པོ་བྱུང་གནང་འདུག། དེ་ནས་༢༠༠༨ལོར་བལ་ཡུལ་གཞུང་དང་གནའ་དངོས་ཤུལ་རྫས་ཞིབ་འཇུག་ཚན་པས་པི་ཊར་གྱིས་གཙུགས་གནང་བའི་གནམ་སྒོ་ཐེབས་རྩ་དང་མཉམ་དུ་བྲག་ཕུག་དེ་ཚོའི་ཐོག་ཞིབ་འཇུག་གནང་རྒྱུའི་གྲོས་མཐུན་བཞག་གནང་ནས་ལས་དོན་འགོ་འཛུགས་གནང་ཡོད་པ་དང༌། ལོ་གཉིས་རྗེས་སུ་ཞིབ་འཇུག་པ་ཚོས་གློ་ཡུལ་གྱི་རི་མཐོ་པོ་ཡོད་སར་བྲག་ཕུག་མང་པོ་ཞིག་བརྙེད་ཐུབ་ཡོད་པ་དང༌། བྲག་ཕུག་དེ་ཚོ་གོང་འོག་ཏུ་ལྡེབས་རིས་རྙིང་པ་དང༌། བོད་ཡིག་ཐོག་སྔར་བོན་གྱི་ཕྱག་དཔེ་ཁྲི་གཅིག་མིན་ཙམ་ཡོད་པའི་གཏེར་མཛོད་ཆེན་པོ་གཉིས་དང༌། མི་༢༧གྱི་རྐང་རུས་བརྙེད་སོན་བྱུང་ཡོད་པ་རེད། བྲག་ཕུག་ནང་གི་ལྡེབས་རིས་དེ་ཚོ་རྒྱ་གར་གྱི་གྲུབ་ཐོབ་ཁག་གི་ཡིན་པ་དང༌། གྲུབ་ཐོབ་རེ་རེའི་མཚན་དང་ཁོང་རྣམ་པའི་རྣམ་ཐར་ཞིབ་ཕྲ་བཀོད་ཡོད་པ་རེད། དེ་བཞིན་བྲག་ཕུག་དེ་ཚོའི་ནང་ཡོད་པའི་མིའི་རྐང་རུས་ལ་བརྟག་ཞིབ་བྱེད་སྐབས་ དེ་ཚོ་ཕལ་ཆེ་བ་རྒྱ་གར་ནུབ་བྱང་ཁུལ་གྱི་མིའི་རིགས་ཀྱི་འབྱུང་ཁུངས་ཡིན་པ་ཤེས་རྟོགས་བྱུང་འདུག།

བསྟན་པ་རིན་གྱིས་འཕགས་ཡུལ་སྨན་གླིང་ནས་ཕུལ་ལོ། ། 

དཔྱད་གཏམ།

དཔྱད་གཏམ་སྤེལ་བ།
Copyright © 2010 Himalayabon.coM All rights reserved. Powered by: Tibetitw.coM
པར་དབང་ཡོད་ས་ཧི་མ་ལ་ཡའི་བོན་གྱི་དྲ་ཚིགས་ཡིན་པས་ཆོག་མཆན་མ་ཐོབ་པར་བརྒྱུད་འགོད་རིགས་བྱེད་མི་ཆོག