ད་ལྟ་ཁྱེད་ཀྱི་གནས་ཡུལ་ནི། - ཧི་མ་ལ་ཡའི་བོན། >> ཆ་འཕྲིན། >> «གནའ་བོའི་བོན་གྱི་ཡི་གེ་རིག་མཛོད»དེབ་ཕྲེང་སུམ་ཅུ་ཅན་པར་དུ་བསྐྲུན་ཡོད་པའི་གནས་ཚུལ།
«གནའ་བོའི་བོན་གྱི་ཡི་གེ་རིག་མཛོད»དེབ་ཕྲེང་སུམ་ཅུ་ཅན་པར་དུ་བསྐྲུན་ཡོད་པའི་གནས་ཚུལ།
[རྩོམ་གྱི་ཡོང་ཁུངས། ངེད་དྲ་བ།] [རྩོམ་པ་པོ། གཟི་ཚའི་སྤྲུལ་སྐུས་བསྡུས།] [ཟླ་ཚེས། 12-03-15] [ཀློག་གྲངས། ]

   ཉེ་ཆར་ལན་ཀྲུའུ་ནུབ་བྱང་གྲངས་ཉུང་མི་རིགས་སློབ་ཆེན་གྱི་ཞིབ་འཇུག་གླིང་གི་དགེ་རྒན་ཆེན་མོ་འབྲུག་ཐར་དང་བློ་བཟང་ལྷུན་གྲུབ་རྡོ་རྗེ་རྣམ་གཉིས་མཉམ་འབྲེལ་གྱིས་གཙོ་སྒྲིག་གནང་ནས་《ཀན་སུའུ་ཏཱང་ཁྲེང་རྫོང་བོད་པའི་དུད་ཚང་དུ་བསྡུ་ཉར་བྱས་པའི་གནའ་བོའི་བོན་གྱི་ཡི་གེ་རིག་མཛོད》ཞེས་པའི་དེབ་ཕྲེང་སུམ་བཅུ་ཐམ་པ་ཅན་ཞིག་ཀན་སུའུ་རིག་གནས་དཔེ་སྐྲུན་ཁང་ནས་པར་དུ་བསྐྲུན་ཡོད་པའི་གནས་ཚུལ་བྱུང་འདུག

དེ་ཡང་སྔ་ནས་ད་བར་དུ་གནའ་བོའི་ཡིག་རྙིང་པར་བསྐྲུན་བྱས་པ་དག་ལས་དཔེ་ཚོགས་འདི་ཉིད་ནང་དོན་སོགས་ཕྱོགས་གང་ཐད་ནས་བལྟས་ན་ཡང་ཕུན་སུམ་ཚོགས་པའི་དཔེ་ཚོགས་རྙིང་ཤོས་ཤིག་ཡིན་པ་དང་། ཆེས་གནའ་བོའི་ཡིག་རྙིང་བོན་གྱི་དཔེ་གཞུང་ཞིག་ཀྱང་ཡིན། སྤྱིའི་གཞུང་ཚན་ཆ་ལ་སུམ་ཅུ་སོ་གཅིག་ཡོད་པ་དང་། ནང་གསེས་སུ་དོན་ཚན་ལྔ་བརྒྱ་དྲུག་ཅུ་ཡོད་པ། དཔེ་རྙིང་འདི་ཉིད་ཀན་སུའུ་ཏཱང་ཁྲེང་གྲོང་ཚོ་སོགས་ཀྱི་ཁྱིམ་ཚང་བཅུ་ཕྲག་ལྷག་གིས་ཉར་ཚགས་བྱས་ཡོད་པ་དང་། དེ་འབྲེལ་གྱི་ཆེད་མཁས་པ་མང་བོས་ཞིབ་འཇུག་བྱས་མཐར་དཔེ་རྙིང་འདི་དག་བོད་ཀྱི་གནའ་བོའི་ཡིག་རྙིང་། གནའ་བོའི་ཞང་ཞུང་གི་ཡིག་གཟུགས་ཀྱི་ཁྱད་ཆོས་སོགས་མང་བོ་ལྡན་པ་ངོས་འཛིན་ཀྱང་གནང་ཡོད་པ་དང་།

   ནང་དོན་གྱི་ཐད་ལ་ཡང་། བོན་གྱི་རྒྱུའི་བོན་སྐོར་དང་། གནའ་བོའི་ཞང་ཞུང་དུས་སྐབས་བོད་ཀྱི་སྤྱི་ཚོགས་གནས་སྟངས་ཀྱི་སྐོར་དང་། ཡུལ་སྲོལ་གོམས་གཤིས་དང་། སྨན་དཔྱད་རིག་པ། རི་བསང་ལབ་ཙེ་བསྟོད་ཚུལ། མོ་རྩིས་གཏོ་དང་གཟུགས་རིས་སྣ་ཚོགས་སོགས། གཞན་ཡང་འབྲས་བུ་ཐེག་པའི་བོན་གཞུང་གི་ནང་དོན་སྐོར་ཕྱོགས་ཀྱང་ལྡན་ཡོད་པ་རེད། དེ་ལྟར་ཡིག་རྙིང་ཕལ་ཆེར་ཕྱོགས་གང་ཐད་ནས་བརྟག་དཔྱད་ཞིབ་འཇུག་བྱས་ན་ཡང་དུས་རབས་ལྔ་བ་དང་དྲུག་པའི་སྔོན་གྱི་བོན་གཞུང་ཡོད་པ་གསལ་བཤད་བྱེད་ཐུབ་པའི་བོན་དང་འབྲེལ་བའི་དཔེ་རྙིང་གལ་ཆེ་ཞིག་ཡིན་པ་རེད།

   དཔེ་རྙིང་འདི་ཧ་གོ་རྗེས་རྒྱལ་ཕྱི་ནང་གི་མཁས་དབང་དང་སྨྱན་སྦྱོར་ཚན་ཁག་ཧ་ཅང་མང་བོས་མཐོང་ཆེན་གནང་བ་དང་། ཁྱད་པར་དུ་མིང་དུ་གྲགས་པའི་བོན་གྱི་ཞིབ་འཇུག་པ་ཆེན་མོ་སྟོང་སྐོར་ཚེ་རིང་ཐར་དང་། ཀྲུང་དབྱང་མི་རིགས་སློབ་ཆེན་གྱི་དགེ་རྒན་ཆེན་མོ་མཁས་དབང་དཔལ་འབར་རྡོ་རྗེ། རྒྱའི་ཞིབ་འཇུག་པ་མཁས་དབང་ཧྲུན་ཝན་རུང་སོགས་ཀྱིས་ཡིག་རྙིང་དཔེ་ཚོགས་འདི་ཉིད་བོད་ཀྱི་གནའ་བོའི་རིག་གཞུང་དང་། ཡི་གེ་སྐོར་དང་། ཆོས་ལུགས་སྐོར། མི་རིགས་ཡུལ་སྲོལ་སོགས་ལ་ཞིབ་འཇུག་བྱེད་པའི་རྒྱུ་ཆ་གལ་ཆེ་ཞིག་ཡིན་པ་ངོས་འཛིན་གནང་བ་དང་། གཞན་ཡང་ཨ་མེ་རི་ཀ་དང་། འཇར་པན། འཇར་མན། དབྱི་ཏ་ལི། ཧྥ་རི་སུ་སོགས་ཀྱི་རྒྱལ་སྤྱིའི་ཆེད་མཁས་མང་བོས་བོན་གྱི་ཡིག་རྙིང་འདི་པར་བསྐྲུན་ཐད་ལ་མཐོང་ཆེན་དང་། གང་མགྱོགས་མགྱོགས་ལ་འགྲེམ་སྤེལ་གནང་རྒྱུའི་རེ་ལྟོས་ཀྱང་བྱས་པ་དང་། འདིས་གནའ་བོའི་བོད་ཀྱི་དུས་རབས་ཀྱི་རིག་གཞུང་གི་མ་ལག་དང་རིན་ཐང་བྲལ་བའི་དཔེ་རྙིང་དང་། ཁྱད་པར་དུ་ཞིབ་འཇུག་པ་དག་གིས་ཞིབ་འཇུག་གནང་ཡུལ་གྱི་རིན་ཐང་ལྡན་པའི་དཔེ་རྙིང་ཞིག་ཡིན་པ་རེད།

ཡོང་ཁུངས། ལན་ཀྲུའུ་ནུབ་བྱང་མི་རིགས་སློབ་ཆེན་ཞིབ་འཇུག་ཁང་ནས།

དཔྱད་གཏམ།

དཔྱད་གཏམ་སྤེལ་བ།
Copyright © 2010 Himalayabon.coM All rights reserved. Powered by: Tibetitw.coM
པར་དབང་ཡོད་ས་ཧི་མ་ལ་ཡའི་བོན་གྱི་དྲ་ཚིགས་ཡིན་པས་ཆོག་མཆན་མ་ཐོབ་པར་བརྒྱུད་འགོད་རིགས་བྱེད་མི་ཆོག